فرمان الہی
نماز کے اوقات
ممتاز بھارتی دفاعی تجزیہ کار پراوین ساہنی نے بھارتی ایئر چیف کے پاکستانی طیارے گرانے کا دعویٰ مشکوک قرار دے دیا ہے۔
ایک انٹرویو کے دوران پراوین ساہنی نے کہا کہ بھارتی ایئر چیف نے اپنے دعوے کے حق میں کوئی ثبوت پیش نہیں کیا ہے، جو دعویٰ بھارتی ایئر چیف نے تقریر میں کیا وہ ایئرفورس کی پریس ریلیز میں نہیں تھا۔
پراوین ساہنی نے کہا کہ یہ کیسے ممکن ہے بھارت ایف 16 کو فضا یا ہینگر میں نشانہ بنائے اور 3 ماہ تک دنیا کو پتہ نہ چلے؟ بھارتی ایئرچیف اب تک یہ نہیں بتا سکے جو طیارے تباہ کیے وہ کون سے ہیں؟
واضح رہے کہ 9 اگست کو بھارتی ایئر چیف نے پاک بھارت جنگ میں ذلت آمیز شکست کے تین ماہ بعد بنا ثبوت 6 پاکستانی طیارے تباہ کرنے کا دعویٰ کیا تھا۔
ایئر چیف مارشل اے پی سنگھ نے بھارت کے لیے عالمی ہزیمت کا سبب بننے والی چار روزہ جنگ میں پاکستان کے 5 لڑاکا طیاروں سمیت 6 طیارے تباہ کرنے کا دعویٰ کیا تھا۔
بھارتی ایئرچیف نے دعویٰ کیا تھا کہ بھارتی فضائیہ نے پاکستان کی ایئر فیلڈز کو نشانہ بنا کر وہاں کھڑے طیاروں کو تباہ کیا۔
یاد رہے کہ پاکستان نے 7 مئی کی فضائی جنگ کے فوراً بعد ہی رافیل سمیت بھارتی لڑاکا طیاروں کو مار گرانے کی تفصیلات تک سامنے رکھ دی تھیں جن کی تائید بھارتی میڈیا کی رپورٹس سے بھی ہوئی تھی۔
علاوہ ازیں پاک فضائیہ نے بھارتی طیاروں کی کمیونیکیشن ہیک کر کے کاک پٹ میں ہوئی گفتگو تک بھی سنا دی تھی۔
