فرمان الہی
نماز کے اوقات
اسٹیٹ بینک آف پاکستان کا کہنا ہے کہ وفاقی حکومت نے جشن معرکہ حق پر 75 روپے کا یادگاری سکّہ جاری کردیا، یادگاری سکہ مسلح افواج کی بہادری کو خراج تحسین پیش کرنے کیلئے جاری کیا گیا ہے۔
یادگاری سکّہ اسٹیٹ بینک کے سروسز کارپوریشن کے فیلڈ دفاتر پر 15 اگست سے دستیاب ہے، یادگاری سکّے کے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ ہے، جس کا رخ شمال مغرب کی طرف ہے۔
ستارے اور ہلال کے اوپر سکّے کے کنارے کے ساتھ ساتھ اردو میں ’’اسلامی جمہوریہ پاکستان‘‘ کے الفاظ کندہ ہیں۔ چاند کے نیچے اور گندم کی اوپر کی طرف خمیدہ دو بالیوں کے اوپر عددی صورت میں اجراء کا سال 2025 درج ہے۔ ستارے اور ہلال کے دائیں اور بائیں جانب بالترتیب سکّے کی مالیت جلی اعداد میں ’’75 ‘‘ اور اردو رسم الخط میں ’’روپیہ‘‘ تحریر ہے۔
75 روپے کے یادگاری سکّے کی دھاتی ساخت مین نکل اور پیتل موجود ہے، جس میں تانبہ 79 فیصد، زنک 20 فیصد اور نکل ایک فیصد ہے، اس کا قطر 30 ملی میٹر اور وزن 13.5 گرام ہے۔
اسٹیٹ بینک کا کہنا ہے کہ سکّے کی دوسری جانب اردو میں’’معرکہ حق‘‘ اور ’’پاکستان ہمیشہ زندہ باد‘‘ رقم ہے، سکّے کے پچھلے رخ پر (دائیں اور بائیں جانب ) دو لڑاکا طیارے، بحری جہاز، ملٹی پل راکٹ لانچر سسٹم ابھرے ہوئے دکھائی دیتے ہیں۔
مذکورہ سکّہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاؤنٹرز پر 15 اگست 2025ء سے دستیاب ہے۔
