فرمان الہی
نماز کے اوقات
صدرِ مملکت آصف علی زرداری نے کہا کہ درخت لگانا ہر شہری کا قومی فریضہ ہے۔
صدرِ مملکت آصف علی زرداری نے مون سون شجر کاری مہم کے موقع پر پیغام میں کہا کہ آج ہم ملک گیرشجر کاری مہم کا آغاز ایسے وقت کر رہے ہیں جب پاکستان کو موسمیاتی تبدیلی کے شدید خطرات لاحق ہیں۔
صدرِ مملکت نے کہا کہ اس سال اگست سے اکتوبر تک پاکستان بھر میں 4 کروڑ 10 لاکھ سے زائد پودے لگائے جائیں گے۔
انہوں نے کہا کہ شجر کاری مہم پاکستان کے محفوظ مستقبل کی ضمانت ہے اور درخت ماحول کے لیے زندگی کی علامت اور موسمیاتی تبدیلی کے خلاف سب سے مضبوط ڈھال ہیں۔
آصف علی زرداری نے بتایا کہ قوم کی ترقی جنگلات اور قدرتی ماحول کے تحفظ پر منحصر ہے، جنگلات کی کٹائی، درجہ حرارت میں اضافہ اور بار بار آنے والے سیلاب لاکھوں زندگیاں متاثر کر رہے ہیں۔
صدرِ مملکت نے کہا کہ شہری سرسبز، صاف اور خوشحال پاکستان کے لیے پودے لگائیں، ہر لگایا گیا درخت آفات کے خلاف ڈھال اور آئندہ نسلوں کے لیے زندگی کا ذریعہ ہے۔
انہوں نے حالیہ سیلاب کی تباہ کاریوں کا حوالہ دیتے ہوئے کہا کہ حالیہ سیلاب اور بارشوں نے ملک کے مختلف حصوں میں تباہی مچائی، ہمیں فیصلہ کن انداز میں زیادہ سے زیادہ درخت لگانے کی ضرورت ہے.
صدرِ مملکت نے زور دیتے ہوئے کہا کہ ہمیں گرین پاکستان پروگرام کو کامیاب بنانا چاہیے، تمام اہل وطن شجر کاری مہم کے نیک مقصد میں اپنا حصہ ڈالیں، نوجوان تبدیلی کے سفیر بن کر شجر کاری مہم کی قیادت کریں اور کسان درخت لگا کر اپنی فصلوں اور ماحول کی حفاظت کرسکتے ہیں۔
