فرمان الہی
نماز کے اوقات
تحریکِ انصاف کے رہنما و سابق اسپیکر قومی اسمبلی اسد قیصر کا کہنا ہے کہ علیمہ خان کے بیٹے کو پکڑا گیا جس کا سیاست سے کوئی تعلق نہیں تھا، ان کے بیٹے کی پی ٹی آئی کے کسی بھی ایونٹ میں کوئی تصویر تک نہیں، جس طرح اغواء کیا گیا، اس سے پتہ چلتا ہے کہ ریاست ماں کے جیسی نہیں ہے۔
اسلام آباد سے جاری کیے گئے بیان میں انہوں نے کہا ہے کہ ظلم و جبر کا نظام ہے، قانون کا کوئی احترام نہیں، عدالتوں میں وہ سکت نہیں رہی کہ شہریوں کو محفوظ رکھ سکیں، آج علیمہ خان کے دوسرے بیٹے شیر شاہ کو اغواء کیا گیا۔
اسد قیصر نے کہا کہ مریم نواز بتائیں جس طرح پنجاب پولیس کر رہی ہے یہ آپ کی ذمے داری ہے، اتنا ظلم کریں، جتنا کل برداشت کر سکیں، اب تمام راستے اور حدود کراس کر دی گئی ہیں۔
ان کا کہنا ہے کہ چیف جسٹس پاکستان سے مطالبہ ہے عدلیہ ہمیں میرٹ کے مطابق انصاف دے، جو 8 دن کا ریمانڈ دیا گیا ہے، کس بنیاد پر دیا گیا ہے؟ واضح ہو گیا ہے کہ یہ سب کچھ حکومت کی ایماء پر ہو رہا ہے۔
اسد قیصر کا کہنا ہے کہ پنجاب کی فاشسٹ حکومت کے خلاف ہر فورم پر آواز اٹھائیں گے، اسمبلی میں بھی آواز اٹھائیں گے، آپ کے حربوں سے ڈرنے والے نہیں ہیں، ہم اپنی تحریک کو آگے بڑھائیں گے اور ظلم کی تاریک رات جلد ختم ہو گی۔
