فرمان الہی
نماز کے اوقات
بھارتی ریاست اتر پردیش کے شہر نوئیڈا میں 76 سالہ بزرگ خاتون کو دہشت گردی کی فنڈنگ میں ملوث ہونے کا الزام دے کر انہیں 43 لاکھ روپے سے محروم کر دیا گیا۔
بھارتی میڈیا کے مطابق نوئیڈا کی رہائشی 76 سالہ سرلا دیوی کو ایک شخص نے پولیس افسر بن کر فون کر کے کہا کہ ان کے نام پر ممبئی میں جعلی بینک اکاؤنٹس کھولے گئے ہیں جنہیں دہشت گردی، جوئے اور حوالہ ٹرانزیکشنز کے لیے استعمال کیا گیا ہے۔
جعلی پولیس افسر نے خاتون سے ٹیلیفونک گفتگو کے دوران کہا کہ ان کا فون نمبر پہلگام حملے کی فنڈنگ میں استعمال ہوا ہے، جس میں 26 افراد مارے گئے تھے۔
نوسر باز نے بزرگ خاتون کو دھمکی دی کہ ان کے خلاف وارنٹ جاری ہو چکا ہے اور گرفتاری سے بچنے کے لیے انہیں رقم بطور ’سیکیورٹی‘ جمع کروانی ہو گی جو تحقیقات مکمل ہونے پر واپس کر دی جائے گی۔
جس پر خاتون نے 20 جولائی سے 13 اگست کے درمیان مختلف اکاؤنٹس میں 8 قسطوں میں 43 لاکھ 70 ہزار بھارتی روپے ٹرانسفر کیے، جن میں سب سے بڑی ادائیگی 11 لاکھ روپے کی تھی۔
ایک موقع پر بزرگ خاتون سے 15 لاکھ روپے مزید مانگے گئے، بصورتِ دیگر گرفتاری کی دھمکی دی گئی، جس پر خاتون نے ایک وکیل سے مشورہ کیا اور حقیقت سامنے آنے پر مزید ادائیگی روک دی اور پولیس سے رجوع کیا۔
پولیس کا کہنا ہے کہ متاثرہ خاتون اس واقعے سے شدید ذہنی دباؤ کا شکار ہیں اور انہوں نے مطالبہ کیا ہے کہ ناصرف ان کی رقم واپس دلائی جائے بلکہ ملزمان کو سخت سزا بھی دی جائے۔
اس معاملے پر سائبر کرائم ونگ نے خاتون کی شکایت درج کر لی ہے اور فراڈ کے پیچھے موجود نیٹ ورک کا سراغ لگانے کے لیے بینک ٹرانزیکشنز کی جانچ پڑتال کی جا رہی ہے۔
