فرمان الہی
نماز کے اوقات
امریکی صدر ڈونلڈ ٹرمپ نے اپنے ساتھی اور قدامت پسند تجزیہ کار چارلی کرک کی موت امریکا کے لیے سیاہ لمحہ قرار دیتے ہوئے کہا کہ انہوں نے حق و سچائی کی راہ میں اپنی جان قربان کی۔
غیر ملکی میڈیا رپورٹس کے مطابق ڈونلڈ ٹرمپ نے چارلی کرک کے قتل کو گھناؤنا قرار دیتے ہوئے کہا، ’آج، اس گھناؤنے فعل کی وجہ سے، چارلی کرک کی آواز پہلے سے زیادہ بڑی اور عظیم تر ہو گئی ہے۔‘
ٹرمپ نے اپنے سوشل میڈیا پلیٹ فارم ٹروتھ سوشل پر پوسٹ میں ایک ویڈیو پیغام جاری کیا جس میں انہوں نے کہا، ’برسوں سے، بنیاد پرست بائیں بازو والوں نے چارلی جیسے شاندار امریکیوں کا موازنہ نازیوں اور دنیا کے بدترین اجتماعی قاتلوں اور مجرموں سے کیا ہے۔‘
انہوں نے مزید کہا، ’گزشتہ برس پنسلوانیا میں مجھ پر ہونے والے حملے سے لے کر امیگریشن ایجنٹوں پر ہونے والے حملوں، نیویارک کی گلیوں میں ہیلتھ کیئر ایگزیکٹو کے بہیمانہ قتل، ہاؤس میجرٹی لیڈر سٹیو سکیلیس اور دیگر تین افراد کو گولی مارنے تک سب کے ذمہ دار بنیاد پرست بائیں بازو ہے۔ ان کے سیاسی بیانات نے بہت سے معصوم لوگوں کو نقصان پہنچایا اور بہت سے لوگوں کی جانیں لے لیں۔‘
امریکی صدر نے بنیاد پرست بائیں بازو کی بیان بازی پر پابندی کا مطالبہ کرتے ہوئے کہا، ’بنیاد پرست بائیں بازو کی بیان بازی امریکا میں دہشت گردی کے لیے براہ راست ذمہ دار ہے اسے فوری بند ہونا چاہیے۔‘
ان کا کہنا تھا کہ میری انتظامیہ ہر ایک کے خلاف کارروائی کرے گی جس نے یہ ظلم کیا اور اس میں تعاون کیا، بشمول وہ تنظیمیں جو انہیں فنڈز فراہم کرتی ہیں اور ان کی حمایت کرتی ہیں۔
واضح رہے کہ گزشتہ روز امریکی ریاست یوٹاہ میں یونیورسٹی تقریب میں خطاب کے دوران چارلی کرک پر فائرنگ کی گئی جس میں وہ گردن پر گولی لگنے سے شدید زخمی ہوگئے تھے۔ انہیں فوری طور پر اسپتال منتقل کیا گیا لیکن وہ جانبر نہ ہوسکے۔
