فرمان الہی
نماز کے اوقات
بالی ووڈ کے سپر اسٹار سلمان خان لداخ میں اپنی نئی ایکشن ڈرامہ فلم بیٹل آف گالوان کی شوٹنگ کے دوران زخمی ہوگئے۔
بھارتی میڈیا کے مطابق فلم کی شوٹنگ کا پہلا شیڈول لداخ میں مکمل کیا گیا جو 45 دنوں پر محیط تھا، اس دوران سلمان خان تقریباً 15 دن سیٹ پر موجود رہے جہاں منفی درجہ حرارت، کم آکسیجن اور دشوار گزار حالات میں ایکشن مناظر فلمائے گئے۔
بھارتی میڈیا کا کہنا ہے کہ شوٹنگ کے دوران انہیں معمولی چوٹیں آئیں، وہ مختصر وقفہ لے کر ممبئی میں اگلے مرحلے کی شوٹنگ شروع کریں گے۔
پروڈکشن ٹیم کے ایک رکن کے مطابق سلمان خان اور ٹیم نے لداخ میں منفی 10 ڈگری سینٹی گریڈ میں شوٹنگ کی، اداکار نے زخموں اور آکسیجن کی کمی کے باوجود انتہائی مشکل حالات میں ریکارڈنگ مکمل کی۔
اب ممبئی میں فلم کا دوسرا شیڈول شروع ہوگا، اس حصے میں ایکشن کے ساتھ ساتھ فلم کے جذباتی مناظر بھی شامل ہوں گے جو کہانی کو مزید گہرائی فراہم کریں گے۔
فلم بیٹل آف گالوان 2020ء میں چین اور بھارت کے درمیان وادی گالوان میں ہونے والے تصادم پر مبنی ہے، فلم میں سلمان خان کے ساتھ چترانگدا سنگھ اور ابھیلاش چوہدری بھی اہم کردار ادا کر رہے ہیں۔
فلم کی ریلیز کی تاریخ کا تاحال اعلان نہیں کیا گیا ہے تاہم امکان ہے کہ یہ آئندہ برس سینما گھروں میں نمائش کے لیے پیش کی جائے گی۔
