فرمان الہی
نماز کے اوقات
ٹی 20 ایشیاء کپ 2025ء کے فائنل میں بھارتی ٹیم نے پاکستان کو 5 وکٹ سے مات دے دی۔
دبئی کرکٹ اسٹیڈیم پر کھیلے گئے میچ میں پاکستان ٹیم نے بھارت کو 147 رنز کا ہدف دیا تھا جو اُس نے 2 گیندوں قبل ہی حاصل کر لیا۔
بھارت کی صرف 20 رنز پر 3 بڑی وکٹ گر گئی تھیں، اس کے بعد تلک ورما نے 69 رنز کی ناقابلِ شکست اننگز کھیلی اور بھارت کو میچ کا فاتح بنا دیا۔
تلک ورما نے پہلے سنجو سیم سن کے ساتھ مل کر اسکور میں 57 رنز کا اضافہ کیا، سنجو 24 رنز بنا کر 77 کے مجموعی اسکور پر پویلین لوٹ گئے۔
تلک ورما نے اس کے بعد شیوم دوبے کے ساتھ مل کر 60 رنز کی شراکت قائم کی اور میچ کو یک طرفہ بنا دیا، دوبے 22 گیندوں پر 33 رنز کی باری کھیل کر فہیم اشرف کا تیسرا شکار بن گئے۔
تلک ورما نے 53 گیندوں کا سامنا کیا اور 4 چھکوں اور 3 چوکوں کی مدد سے 69 رنز کی باری کھیلی اور ناٹ آؤٹ رہے۔
فائنل میں حارث روف نے 3 اعشاریہ 4 اوور میں 50 رنز دیے اور کوئی وکٹ بھی حاصل نہ کر سکے جبکہ ابرار احمد نے 4 اوور میں 29 اور شاہین آفریدی نے 4 اوور 20 رنز کے عوض ایک ایک وکٹ حاصل کی۔
گرین شرٹس کی طرف سے صائم ایوب نے 3 اوورز میں 16 رنز دیے جبکہ فہیم اشرف نے 4 اوورز میں 29 رنز کے عوض 3 وکٹ حاصل کیں۔
دبئی میں پاکستان اور بھارت کی ٹیمیں تیسرے بار مدِمقابل ہیں، بھارت نے ٹاس جیت کر پاکستان کو پہلے بیٹنگ کی دعوت دی تھی۔
پہلی وکٹ پر 84 رنز کی شراکت بنانے والی پاکستانی ٹیم نے صرف 62 رنز کے اضافے پر تمام وکٹ گنوائیں۔
صاحبزادہ فرحان نے 57 ، فخر زمان نے 46 اور صائم ایوب نے 14 رنز کی اننگز کھیلی، باقی کوئی اور کھلاڑی خاطر خواہ پرفارمنس نہیں دے سکا۔
وکٹ کیپر بیٹر محمد حارث، شاہین شاہ آفریدی اور فہیم اشرف فائنل میچ میں صفر رنز پر وکٹ دے بیٹھے۔
سلمان علی آغا 8، محمد نواز اور حارث رؤف 6، 6 جبکہ حسین طلعت صرف 1 رنز کے ساتھ پویلین لوٹے۔
بھارت کے کلدیپ یادیو نے 4، ورون چکرورتی، جسپریت بمرا اور اکثر پٹیل نے 2، 2 وکٹ حاصل کیں۔
آج میچ کے ٹاس کے لیے پاکستانی کپتان سلمان علی آغا اور بھارتی کپتان سوریا کمار یادیو ٹاس کے لیے میدان میں اترے، سوریا کمار نے ٹاس جیت کر پہلے فیلڈنگ کا فیصلہ کیا۔
ٹاس کے بعد دونوں ٹیموں کے کپتانوں نے ایک بار پھر ہاتھ نہیں ملایا، تاہم پاکستانی کپتان نے پاکستانی پریزیٹر سے جبکہ سوریا کمار نے بھارتی پریزنٹر سے بات کی۔
پاکستان نے فائنل میں بھارت کے خلاف بنگلادیش کے خلاف میچ کی فاتح ٹیم کو اتارنے کا فیصلہ کیا ہے جبکہ بھارت نے ارشدیپ اور ہرشیت کی جگہ رنکو سنگھ اور شیوم دبوے کو کھیلانے کا فیصلہ کیا ہے۔
ٹیم پاکستان کے کپتان سلمان علی آغا نے کہا کہ پچ میں کوئی خاص تبدیلی نہیں دیکھ رہا ہوں، ہم پہلے بیٹنگ کے لیے تیار ہیں، ہم ٹاس جیتتے تو پہلے بیٹنگ ہی کرتے۔
پاکستان الیون میں صاحبزادہ فرحان، فخر زمان، صائم ایوب، سلمان علی آغا، حسین طلعت، محمد نواز، فہیم اشرف، محمد حارث، شاہین آفریدی، حارث روف اور ابرار احمد شامل ہیں۔
دونوں ٹیموں کے درمیان ستمبر 2022ء کے بعد سے اب تک 5 میچز کھیلے جا چکے ہیں، جن میں سے 4 میں بھارت اور 1 میچ میں فتح پاکستانی ٹیم کا مقدر بنی ہے۔
پاکستان اور بھارت کا فائنل دیکھنے کے لیے ملک بھر میں بڑی اسکرینیں لگ چکی ہیں، شائقین کرکٹ کا جوش و خروش عروج پر ہے۔
شائقینِ کرکٹ کی بڑی تعداد کو گزشتہ 2 میچز میں شکست کے بعد اس بار قومی کرکٹ ٹیم سے روایتی حریف کے خلاف اچھی کارکردگی دکھانے کی امید ہے۔
