فرمان الہی
نماز کے اوقات
وزیراعلیٰ پنجاب مریم نواز نے کہا ہے کہ مخالفین یاد رکھیں، نون، میم اور شین سیسہ پلائی دیوار کی طرح متحد ہیں، پنجاب کے 25 اضلاع میں کرائم ریٹ زیرو ہے۔
پاکپتن میں الیکٹرک بسوں کی فراہمی کے افتتاحی منصوبے سے خطاب میں مریم نواز نے کہا کہ مخالفین کوتنقید کیلئےکچھ نہیں ملتا تو نون میں سے شین نکالتے ہیں، شین میں سے نون نکالتے ہیں۔
انہوں نے کہا کہ یاد رکھو، نون، میم، شین سیسہ پلائی دیوار کی طرح متحد ہیں، نون سے شین نکالنے، میم سےنون نکالنا، میم سے شین نکالنا ایسے بڑے آئے، بڑی کوشش کی۔
وزیراعلیٰ پنجاب نے مزید کہا کہ 40 سال سے یہ کوشش ہو رہی ہے لیکن ان کو دھول چاٹنا پڑی، آج وہ سب اپنے انجام کو پہنچے، جو اب کر رہے ہیں، وہ بھی انجام کو پہنچیں گے۔
اُن کا کہنا تھا کہ پنجاب میں ترقی اور خدمت پر تنقید کے لیے آپ کو شین، نون، میم ملا ہے تو آپ کو انا للہ وانا الیہ راجعون پڑھ لینا چاہیے۔
مریم نواز نے یہ بھی کہا کہ 38 اضلاع تک ترقی نہیں پہنچے گی تو پنجاب ترقی یافتہ نہیں، چھوٹے شہروں کو بھی خوبصورت بنا رہے ہیں، پاکپتن مجھے پہلے سے زیادہ صاف ستھرا نظر آیا۔
انہوں نے کہا کہ کبھی پنجاب میں ہاتھوں سے جھاڑو دیتے لوگ نظر آتے تھے، ستھرے پنجاب کے تحت پورے پنجاب میں ایک طرح کی مشینری ہے۔
وزیراعلیٰ پنجاب نے کہا کہ کسی ضلع کو دوسرےضلع سےصفائی کیلئے مشینری نہیں مانگنا پڑے گی، ستھرا پنجاب توقع سے زیادہ بڑا پروگرام بن چکا ہے۔
اُن کا کہنا تھا کہ کوئی سوچ سکتا تھا کہ میانوالی، وزیرآباد میں الیکٹرک پبلک ٹرانسپورٹ آئے گی، لوگ ٹوٹی پھوٹی بسوں میں سفر کرنے پر مجبور تھے۔
مریم نواز نے کہا کہ الیکٹرک بس کا کرایہ 20 روپے ہوگا، اتنا تو چنگ چی کا بھی کرایہ نہیں ہوتا جبکہ طالب علموں، خواتین، اسپیشل افراد کےلیے بس فری ہے۔
انہوں نے کہا کہ چھوٹےشہروں کو نظر انداز کردیا جاتا تھا، میں ان شہروں کیلئےسہولت لائی ہوں، بسوں کو سی سی ٹی وی سے مانیٹر کرتے ہیں۔
وزیراعلیٰ پنجاب نے کہا کہ لوگوں نے الیکٹرک بسوں پر ایسی خوشی منائی جیسے عید کا سماں ہو، دسمبر تک 11 سو الیکٹرک بسیں آجائیں گی۔
اُن کا کہنا تھا کہ اپریل مئی تک 1500 الیکٹرک بسیں آجائیں گی، بڑی خوشی ہے کہ لوگ اس بس کو استعمال کر رہے ہیں، لوگوں کو ایک باعزت سواری کم کرائے پر دستیاب ہے۔
مریم نواز نے کہا کہ گجرات میں بارش سے 4 ، 4 فٹ پانی جمع ہوگیا تھا، وہاں اب 26 ارب روپے سے سیوریج لائنیں بچھانے جارہے ہیں، یہ اقدام پورے پنجاب کےلیے بھی ہوگا۔
انہوں نے کہا کہ انڈر گراؤنڈ اسٹوریج بنانے جارہے ہیں تاکہ بارش سے عوام کوتکلیف نہ ہو، پنجاب کےجن علاقوں میں پینے کا پانی نہیں وہاں پروجیکٹ لا رہے ہیں۔
وزیراعلیٰ پنجاب نے کہا کہ 25 شہروں میں واسا بنا چکے ہیں، ہر شہر کی اپنی واسا بنا رہے ہیں، پچھلے سال 20 ہزار کلومیٹر انٹرکنکٹڈ سڑکیں بنائی ہیں، ہر گاؤں میں 25 کلومیٹر سڑکیں بنانے جارہے ہیں۔
مریم نواز نے کہا کہ پنجاب میں 90 ہزار گھر بنا رہے ہیں، کوشش ہوگی کہ 5 سال میں 5 سے 7 لاکھ لوگوں کو اپنی زمین اور اپنا گھر ملے۔
اُن کا کہنا تھا کہ 25 کروڑ روپے کی لاگت سے چین سے کینسر کے علاج کی مشین لائی ہوں، نادار مریضوں کے کینسر علاج کے لئے 5 ارب روپے دیے ہیں۔
وزیراعلیٰ پنجاب نے کہا کہ پورے پنجاب میں گھر کی دہلیز پر دوائی پہنچائی جارہی ہے جبکہ کسان کارڈ پر بغیر سود ڈیڑھ لاکھ روپے قرض دیتے ہیں۔
انہوں نے کہا کہ وزیراعلیٰ بنی تو کھلے عام قتل اور ڈاکے پڑ رہے تھے، پنجاب کے 25 اضلاع میں زیرو کرائم ہے، رات 12 بجے بھی ماں بیٹی سڑک پر نکلے تو اسے کوئی خوف نہ ہو، عوام کی زندگی بہتر بنانے کا جذبہ ہو تو کوئی طاقت نہیں روک سکتی۔
مریم نواز نے کہا کہ پنجاب میں تاریخ کا سب سے بڑا سیلاب آیا، سب سے بڑا ریسکیو آپریشن ہوا، اتنا بڑا سیلاب تھا کہ اگر حکومت جاگ نہ رہی ہوتی تو جانی نقصان ہزاروں میں ہوتا، 25 لاکھ لوگوں کو محفوظ مقام پر منتقل کیا گیا۔
