فرمان الہی
نماز کے اوقات
وزیرِ اعظم محمد شہباز شریف نے دیوالی کے موقع پر اپنے پیغام میں کہا ہے کہ پاکستان میں عقائد کا تنوع ہمارے لوگوں کے درمیان اتحاد کا حقیقی ذریعہ ہے، ہندو برادری کا ہمارے سماجی، اقتصادی اور سیاسی شعبوں میں کردار ہماری قوم کو مضبوط بنا رہا ہے۔
وزیرِ اعظم محمد شہباز شریف نے پاکستان سمیت دنیا بھرمیں ہندو برادری کو دیوالی کی ڈھیروں خوشیوں کی مبارکباد دی ہے۔
وزیراعظم کا کہنا ہے کہ روشنیوں کا تہوار دیوالی، روشنی کی تاریکی اور امید کی مایوسی پر فتح کے جشن کی عکاسی کرتا ہے، میں پاکستان میں ہندو برادری کی گراں قدر خدمات کو خراجِ تحسین پیش کرتا ہوں، دیوالی مناتے وقت آئیں ہم سب مل کر مستقبل کو مثبت سوچ اور اتحاد کے نظریے سے دیکھیں۔
انہوں نے مزید کہا کہ پاکستانی ہونے کے ناطے ہم اپنے معاشرے میں تنوع پر فخر کرتے ہیں جو ہمارے قومی دھارے کو مزید مضبوط بناتا ہے، یہ ہماری مشترکہ ثقافت کو تقویت بخشتا ہے۔
وزیراعظم شہباز شریف نے کہا کہ ہندو اور دیگر اقلیتی برادریوں سے تعلق رکھنے والے پاکستانیوں کو اپنے ملک کی ترقی کے لیے شانہ بشانہ کام کرتے ہوئے دیکھ کر خوشی ہوتی ہے۔ بابائے قوم قائداعظم محمد علی جناح نے ایک ایسے ہی پاکستان کا تصور دیا تھا، ایسا پاکستان جو تمام برادریوں کوبلا تفریق مذہب، نسل یا ذات کے برابری اور آزادی حاصل ہو۔
اِن کا یہ بھی کہنا تھا کہ حکومت اِن اقدار کو برقرار رکھنے اور اس بات کو یقینی بنانے کے لیے پُرعزم ہے، پُرعزم ہیں کہ پاکستان میں ہر کمیونٹی کو ان کے عقائد سے قطع نظر مساوی حقوق اور یکساں ترقی کے مواقع حاصل ہوں۔
وزیرِ اعظم محمد شہباز شریف نے دیوالی کے موقع پر ہندو کمیونٹی کے لیے نیک تمناؤں کا اظہار کرتے ہوئے کہا کہ ہماری یہ دعا ہے کہ روشنیوں کا یہ تہوار آپ کی زندگیوں میں امن اور خوشحالی لائے، یہ تہوار ہمارے ملک میں تمام مذاہب کے لوگوں کے درمیان اتحاد، بھائی چارے کے رشتوں کو پروان چڑھائے۔
