فرمان الہی
نماز کے اوقات
اسلام آباد (مہتاب حیدر) ٹیکسوں میں اضافہ بھی کام نہ آیا؛ ایف بی آر کو 143 ارب روپے کی کمی کا سامنا، ایف بی آر کے اعلیٰ حکام کا کہنا ہے کہ نومبر 2025 کے لیے ریونیو وصولی 900ارب روپے کا ہندسہ عبور کر سکتی ہے۔ تفصیلات کے مطابق سست معاشی سرگرمیوں، صنعتی یونٹوں کی بندش، اور ٹیکس کی شرحوں میں اضافے کے باعث رواں مہینے (نومبر 2025) میں محصولات کا خسارہ دوگنا ہو گیا، کیونکہ فیڈرل بورڈ آف ریونیو(ایف بی آر) کو اپنے مطلوبہ ہدف کے حصول میں 143 ارب روپے کا شارٹ فال (کمی) کا سامنا کرنا پڑا۔ایف بی آر کے اعلیٰ حکام کا کہنا ہے کہ نومبر 2025 کے لیے ریونیو وصولی 900 ارب روپے کا ہندسہ عبور کر سکتی ہے۔ پہلے چار مہینوں (جولائی تا اکتوبر) کے دوران، ایف بی آر کو اوسطاً تقریباً 68 ارب روپے ماہانہ کے حساب سے شارٹ فال کا سامنا کرنا پڑا تھا، تاہم، پانچویں مہینے (نومبر 2025) میں یہ فرق بڑھ کر 143 ارب روپے تک جا پہنچا، جیسا کہ ہفتہ کی شام تک کے عارضی محصولات کے اعداد و شمار سے ظاہر ہوتا ہے، جو اس بات کی نشاندہی کرتا ہے کہ ہر گزرتے مہینے کے بعد یہ شارٹ فال بڑھنا شروع ہو گیا ہے۔ ایف بی آر کا 14130 ارب روپے کا سالانہ ہدف حاصل کرنا ناممکن دکھائی دیتا ہے۔
