• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وزیراعلیٰ کی زیرصدارت محکمہ صحت کا جائزہ اجلاس، مراد علی شاہ کی جاری منصوبوں پر کام تیز کرنے کی ہدایت

آج کا اخبار
اہم خبریں
30 نومبر ، 2025
کراچی ( اسٹاف رپورٹر)وزیراعلیٰ سندھ مراد علی شاہ نے محکمہ صحت کو جاری ترقیاتی منصوبوں پر کام تیز کرنے کی ہدایت دے دی،تفصیلات کے مطابق گزشتہ روز وزیر اعلیٰ سندھ کی زیر صدارت محکمہ صحت سے متعلق 2025-26کے جائزہ اجلاس کا انعقاد وزیر اعلیٰ ہاؤس میں ہوا جس میں صوبائی وزیر صحت ڈاکٹر عذرا فضل پیچوہو، وزیر منصوبہ بندی و ترقیات جام خان شورو، وزیر ورکس اینڈ سروسز حاجی علی حسن زرداری، چیف سیکرٹری آصف حیدر شاہ، چیئرمین منصوبہ بندی و ترقیات نجم شاہ، سیکرٹری خزانہ فیاض جتوئی، سیکرٹری وزیر اعلیٰ رحیم شیخ، سیکرٹری ورکس اینڈ سروسز نواز سوہو، سیکرٹری صحت ریحان بلوچ اور دیگر افسران نے شرکت کی۔محکمہ صحت نے سالانہ ترقیاتی پروگرام 2025-26 پر تفصیلی بریفنگ دی، جو 178 اسکیموں پر مشتمل ہے، 140 جاری اور 38 نئی اسکیمیں شامل ہیں اور جن کے لیے 45.37 ارب روپے مختص کیے گئے ہیں۔ڈاکٹر عذرا پیچوہو نے بتایا کہ فنڈز کی تخصیص، اجراء اور اخراجات کی سخت نگرانی کی گئی ہے۔ 17 نومبر 2025 تک استعمال کی شرح 21 فی صد رہی۔ تدریسی اسپتالوں، ضلعی اسپتالوں، طبی تعلیم، حفاظتی پروگراموں اور غیر ملکی امداد سے چلنے والے منصوبوں کی پیش رفت سے بھی آگاہ کیا گیا۔16فلیگ شپ صحت منصوبوں کی رفتار بڑھانے کی ہدایات، وزیر اعلیٰ سندھ سید مراد علی شاہ نے صوبے کے فلیگ شپ منصوبوں کا جائزہ لیا اور تمام محکموں کو ہدایت کی کہ کام کی رفتار تیز کی جائے اور آئندہ مالی سال میں مقررہ وقت پر تکمیل یقینی بنائی جائے۔ انہوں نے کہا کہ ان میں سے کئی اسکیمیں انتہائی اہم اور جان بچانے والی سہولیات ہیں جنہیں کسی قسم کی تاخیر کا شکار نہیں ہونا چاہیے۔این آئی سی وی ڈی کا پیڈیاٹرک کارڈیک یونٹ اجلاس کا آغاز نیشنل انسٹی ٹیوٹ آف کارڈیو ویسکولر ڈیزیزز کراچی کے پیڈیاٹرک کارڈیک یونٹ کے جائزے سے ہوا۔ نظرثانی شدہ پی سی ون 9.924 ارب روپے کی لاگت کے ساتھ جمع کرایا جاچکا ہے۔ اجلاس کو آگاہ کیا گیا کہ پی ڈی ڈبلیو پی کا اجلاس ہو چکا ہے اور لاگت میں اضافے کی منظوری کے لیے سمری وزیر اعلیٰ کو بھیج دی گئی ہے۔ وزیر اعلیٰ نے ہدایت کی کہ اس عمل کو فوراً مکمل کیا جائے۔ انہوں نے کہا کہ یہ جان بچانے والا منصوبہ ہے اورلاگت میں اضافہ رکاوٹ نہیں بننا چاہیے، اسے فوری طور پر حتمی شکل دیں۔50بستروں پر مشتمل اسپتال کے حوالے سے وزیر اعلیٰ کو بتایا گیا کہ گلبرگ ٹاؤن انچولی، فیڈرل بی ایریا بلاک-13 میں 50 بستروں کے اسپتال کی عمارت مکمل ہوچکی ہے۔ وزیر اعلیٰ نے کہا کہ وہ 148.196 ملین روپے جاری کرچکے ہیں لہٰذا خریداری کے عمل کو فوری طور پر مکمل کیا جائے تاکہ منصوبہ موجودہ مالی سال میں مکمل ہوسکے۔رزاق آباد میڈیکل کمپلیکس نیشنل ہائی وے، بن قاسم ٹاؤن کے میڈیکل کمپلیکس کے لیے جون 2025 میں نظرثانی کی گئی تھی اور اس کی تکمیل کے لیے 3.082 ارب روپے اضافی درکار ہیں۔ وزیر اعلیٰ نے محکمہ خزانہ کو ہدایت کی کہ 2025-26 کے دوران مختص کیے گئے فنڈز فوراً جاری کیے جائیں تاکہ تعمیر کی رفتار متاثر نہ ہو۔50 بستروں پر مشتمل گلشن حدید، ملیر کے اسپتال پر کام جاری ہے۔ منصوبہ مکمل فنڈڈ ہے اور خریداری کا عمل شروع ہوچکا ہے۔ وزیر اعلیٰ کو یقین دہانی کرائی گئی کہ یہ اسکیم مالی سال 2025-26 میں مکمل ہوجائے گی۔وزیر اعلیٰ نے کہا کہ کمال خان گوٹھ کی ماؤنٹی ہوم کو 50 بستروں کے اسپتال میں اپ گریڈ کرنے کا منصوبہ مکمل فنڈڈ ہے لہٰذا خریداری کے عمل کو تیز کرکے منصوبہ آئندہ مالی سال میں مکمل کیا جائے۔وزیر اعلیٰ نے شہید محترمہ بینظیر بھٹو ٹراما سینٹر میں امپیوٹیشن فری سندھ کے تحت قائم کیے گئے ویسکولر اور اینڈو ویسکولر سرجری ڈپارٹمنٹس پر اطمینان کا اظہار کیا۔ مختص فنڈز کا 100 فیصد استعمال ہوچکا ہے۔ انہوں نے اس منصوبے کو ٹراما اور اعضا بچاؤ نگہداشت میں انقلابی قدم قرار دیا۔ وزیر اعلیٰ کو سول اسپتال کراچی کے ریڈیالوجی ڈیپارٹمنٹ کے نئے منصوبے پر بریفنگ دی گئی اور بتایا گیا کہ پی سی ون تیار ہوچکا ۔
اہم خبریں سے مزید