فرمان الہی
نماز کے اوقات
بھارتی ریاست اتر پردیش میں نئی نویلی دلہن کو شادی کے صرف ایک دن بعد جہیز کے مطالبات پورے نہ ہونے پر گھر سے نکال دیا گیا۔
بھارتی میڈیا کی رپورٹ کے مطابق پہلے سسرالیوں نے دلہن پر اپنے میکے سے موٹر سائیکل یا دو لاکھ روپے لانے کا دباؤ ڈالا، دلہن کے انکار پر بعد ازاں اِسے گھر سے نکال دیا۔
بھارتی میڈیا کے مطابق یہ شادی 29 نومبر کو ہوئی تھی جبکہ شادی کے اگلے روز رخصت ہو کر دلہن جب اپنے سسرال پہنچی تو اِسے استقبال کے بجائے مطالبات اور طعنوں کا سامنا کرنا پڑا۔
سسرالیوں نے دلہن پر دباؤ ڈالا کہ وہ اپنے شوہر کے لیے کچھ نہیں لائی اور فوراً موٹر سائیکل یا اس کے بدلے دو لاکھ روپے لانے کو کہا، اس دوران سسرالیوں نے دلہن کے زیورات اور شادی پر ملنے والی نقدی بھی چھین لی اور اسے زد و کوب کرنے کے بعد گھر سے نکال دیا۔
دلہن کے والدین کا کہنا ہے کہ وہ شادی پر لاکھوں روپے خرچ کرچکے ہیں، جہیز میں بیٹی کے سسرالیوں کو صوفہ سیٹ، بیڈ، ڈریسنگ ٹیبل، ٹی وی، واشنگ مشین، واٹر کولر، برتنوں کے متعدد سیٹ اور دیگر گھریلو سامان بھی دیا تھا، دلہن کے والدین کا کہنا ہے کہ اگر بیٹی کا سسرال موٹر سائیکل کا مطالبہ پہلے کرتا تو وہ یہاں رشتہ ہی نہ کرتے۔
دلہن کے والدین نے پولیس میں شکایت درج کروانے کے ساتھ ساتھ شادی پر کیے گئے اخراجات کی واپسی کا مطالبہ بھی کیا ہے۔
