فرمان الہی
نماز کے اوقات
آسٹریلیا میں پیش آنے والا ایک سنسنی خیز واقعہ سامنے آگیا، جس کی ویڈیو نے دیکھنے والوں کے دل دہلا دیے۔
اسکائی ڈائیونگ کے دوران ایک ڈائیور کا پیراشوٹ طیارے کے پر میں پھنس گیا، جس کے باعث وہ ہزاروں فٹ بلند آسمان میں معلق رہ گیا، خوش قسمتی سے ڈائیور اس خوفناک حادثے میں زندہ بچ گیا۔
یہ واقعہ کینز کے جنوب میں ایک اسٹنٹ کے دوران پیش آیا تھا، تاہم تحقیقات مکمل ہونے کے بعد آسٹریلین ٹرانسپورٹ سیفٹی بیورو (ATSB) نے اس کی ویڈیو جاری کی ہے۔
رپورٹ کے مطابق 4600 میٹر کی بلندی پر 16 اسکائی ڈائیورز کو ایک فارمیشن بنانی تھی اور پورا منظر ایک کیمرہ آپریٹر فلم کر رہا تھا، جیسے ہی پہلے ڈائیور نے طیارے سے چھلانگ لگانے کی کوشش کی، اس کا پیراشوٹ ہینڈل طیارے کے وِنگ میں پھنس کر فوری طور پر کھل گیا۔
پیراشوٹ کھلتے ہی ڈائیور زور سے پیچھے کی جانب اچھل گیا اور اس کے دونوں پاؤں طیارے سے ٹکرائے، پیراشوٹ طیارے کے پر میں لپٹ گیا، جس کے باعث وہ ہوا میں لٹک گیا۔
آسٹریلین ٹرانسپورٹ سیفٹی بیورو کے مطابق ڈائیور نے انتہائی خطرناک صورتحال میں حاضر دماغی کا مظاہرہ کرتے ہوئے ایک ہک نائف سے پیراشوٹ کی رسیاں کاٹ دیں اور خود کو آزاد کر لیا۔
آزاد ہونے کے بعد اسے اپنا مین پیراشوٹ کھولنے میں کامیابی ملی، جس کی بدولت وہ بحفاظت زمین پر اترا۔
اس واقعے میں طیارے کی دُم کو شدید نقصان پہنچا اور پائلٹ کو جہاز کنٹرول کرنے میں مشکلات پیش آئیں، پائلٹ نے مے ڈے کال بھی جاری کی، لیکن مہارت کا مظاہرہ کرتے ہوئے طیارے کو بحفاظت اتار لیا۔
