فرمان الہی
نماز کے اوقات
وزیرِ اعظم شہباز شریف کا کہنا ہے کہ معرکۂ حق میں مودی سرکار کو وہ سبق سکھایا ہے جو وہ کبھی نہیں بھولے گی، قوم کی دعاؤں سے جنگ میں اللّٰہ تعالیٰ نے پاکستان کو فتح دلائی، بھارت یہ شکست کبھی فراموش نہیں کر سکے گا۔
ہری پور میں پرائم منسٹر لیپ ٹاپ اسکیم کی تقریب سے خطاب میں انہوں نے کہا کہ آج تک 100 فیصد میرٹ پر 6 لاکھ لیپ ٹاپ تقسیم کیے، خیبر پختون خوا دلیر اور غیور عوام کا صوبہ ہے، دہشت گردوں کے خلاف اس صوبے کے عوام، پولیس اور فوج نبرد آزما ہیں۔
وزیرِ اعظم نے کہا کہ آپ کی قربانیوں کی بدولت ملک میں امن قائم ہوا، آپ کی عظیم قربانیوں کو تاریخ قیامت تک سنہرے حروف سے یاد رکھے گی، آج آپ قوم کے عظیم معمار بننے جا رہے ہیں۔
انہوں نے کہا کہ چاروں صوبے ترقی کریں گے تو پاکستان ترقی کرے گا، بچوں کو تعلیم دینا ہمارا فرضِ اوّل ہے، اے آئی کی جدید تعلیم کے لیے ملک بھر سے طلبہ کو باہر بھیجا جائے گا۔
وزیراعظم شہباز شریف نے کہا کہ ملکی معیشت منجھدار سے نکل آئی ہے، ترقی کا سفر جادو ٹونے سے نہیں ہوگا، ملک کی ترقی اتحاد سے ممکن ہے۔
اپنے خطاب میں وزیرِ اعظم شہباز شریف نے ہری پور میں دانش اسکول کی تعمیر کا اعلان بھی کیا۔
