فرمان الہی
نماز کے اوقات
متحدہ عرب امارات میں نئے سال سے قبل گرد و غبار کے شدید طوفان کے خدشے کے باعث نیشنل سینٹر آف میٹرولوجی (این سی ایم) نے عوام اور خاص طور پر گاڑی چلانے والوں کے لیے اہم ہدایات جاری کی ہیں۔
نیشنل سینٹر آف میٹرولوجی نے الرٹ جاری کرتے ہوئے کہا ہے کہ تیز ہوائیں آنے والے دنوں میں حدِ نگاہ کو متاثر کر سکتی ہیں جس کے پیشِ نظر ڈرائیونگ کے دوران خطرناک صورتحال پیدا ہو سکتی ہے۔
محکمہ موسمیات کی جانب سے شہریوں کو گرد آلود موسم میں غیر ضروری طور پر باہر نکلنے سے گریز اور گھروں اور عمارتوں کے دروازے اور کھڑکیاں بند رکھنے کی ہدایت کی گئی ہے۔
عوام کو یہ بھی ہدایت کی گئی ہے کہ موسم سے متعلق تازہ معلومات صرف سرکاری ذرائع سے ہی حاصل کریں۔
’گلف نیوز‘ کے مطابق این سی ایم نے سمندر کے کنارے جانے والوں کو بھی خبردار کیا ہے، تیز ہواؤں کے باعث سمندر میں شدید طغیانی کا امکان ہے، خاص طور پر بحیرہ عمان میں حالات زیادہ خراب ہو سکتے ہیں۔
اس سلسلے میں سات فٹ تک اونچی لہروں کے خدشے کے پیشِ نظر ’ییلو الرٹ‘ جاری کیا گیا ہے۔
