فرمان الہی
نماز کے اوقات
گورنر سندھ کامران ٹیسوری نے کہا ہے کہ سانحہ گل پلازا کو 2 ہفتے ہوگئے، اب تک کچھ بھی نہیں ہوا ہے۔
گورنر سندھ سانحہ گل پلازا میں جاں بحق 6 افراد کے دہلی کالونی میں واقع گھر پہنچے اور کہا کہ میں ایسے گھر آیا ہوں، جہاں کے 1 ہی خاندان کے 6 افراد جھلس کر شہید ہوئے ہیں۔
انہوں نے کہا کہ میرے پاس الفاظ نہیں کہ ان کو کیسے صبر دلایا جائے گا، سب ہی جاننا چاہتے ہیں ذمے دار کون ہیں، ان کو سزا ملے گی بھی یا نہیں۔
کامران ٹیسوری نے مزید کہا کہ سانحے کو 2 ہفتے ہوگئے اب تک کچھ نہیں ہوا، پنجاب میں ایک ماں بیٹی کی ہلاکت پر دوسرے دن انصاف نظر آتا، شکر عوام کے دباؤ پر جوڈیشل کمیشن بنانے کا اعلان کیا گیا ہے۔
اُن کا کہنا تھا کہ اس علاقے سے رکن صوبائی اسمبلی تحریک انصاف کا ہے، وہ بھی نہیں آئے، جماعت اسلامی کا ٹاؤن انچارج بھی یہاں نہیں پہنچا، انہیں شرم آنی چاہیے۔
گورنر سندھ نے یہ بھی کہا کہ آج بھی بلوچستان میں دہشت گردوں نے بلوچوں کو شہید کیا، دہشت گردوں کے خلاف موثر کارروائی پر فورسز کو خراج تحسین پیش کرتے ہیں۔
انہوں نے اہل خانہ سے ملاقات میں دلی تعزیت اور افسوس کا اظہار کیا اور کہا کہ متاثرہ خاندان کو انصاف اور ہر ممکن تعاون فراہم کیا جائے گا۔
