فرمان الہی
نماز کے اوقات
ایران میں امریکا اور اسرائیل کی جانب سے کیے گئے فضائی حملوں کے دوران رہائشی علاقوں، اسپتالوں اور تعلیمی اداروں کو نقصان پہنچا جس کے نتیجے میں تہران نے عالمی برادری سے فوری مداخلت اور کارروائی کا مطالبہ کیا ہے۔
’الجزیرہ‘ کی ایک رپورٹ کے مطابق ایرانی وزارتِ خارجہ کے ترجمان اسماعیل بقائی نے کہا ہے کہ حملوں میں اسپتالوں، اسکولوں، ہلالِ احمر کے مراکز اور ثقافتی مقامات کو بھی نقصان پہنچا ہے جو بین الاقوامی قوانین کی سنگین خلاف ورزی ہے۔
ایران نے عالمی اداروں سے مطالبہ کیا ہے کہ ایسے حملوں کو روکنے کے لیے فوری اقدامات کیے جائیں۔
ایرانی ہلالِ احمر کے سربراہ پیر حسین کولیوند نے عالمی ریڈ کراس کمیٹی کو خط لکھ کر طبی اور تعلیمی مراکز پر اثر انداز ہونے والے حملوں کی مذمت کرنے اور جنیوا کنونشن کے تحت نگرانی کے نظام کو فعال کرنے کا مطالبہ کیا ہے۔
ایرانی حکام کے مطابق مختلف شہروں میں کئی اسپتال فضائی حملوں کے نتیجے میں متاثر ہوئے اور مریضوں کو ہنگامی طور پر محفوظ مقامات پر منتقل کرنا پڑا۔
عرب میڈیا کے مطابق تہران کے گاندھی اسپتال کے قریب دھماکے سے عمارت کو شدید نقصان پہنچا جبکہ آئی وی ایف کا شعبہ تباہ ہو گیا، طبی عملے نے حساس طبی سامان اور نومولود بچوں کو فوری طور پر محفوظ مقام پر منتقل کیا۔
ایران کے مطابق اہواز، مشرقی آذربائیجان، سیستان بلوچستان اور ہمدان میں بھی طبی مراکز متاثر ہوئے۔
رپورٹس کے مطابق کچھ حملے سرکاری ٹی وی اور مواصلاتی تنصیبات کو نشانہ بنانے کے دوران قریبی طبی مراکز کو نقصان پہنچنے کا باعث بنے۔
دوسری جانب عالمی ادارۂ صحت نے صورتِ حال پر تشویش کا اظہار کرتے ہوئے تحقیقات شروع کر دی ہیں۔
