فرمان الہی
نماز کے اوقات
پاکستانی اداکارہ نادیہ جمیل نے حالیہ انٹرویو میں اپنی عمر اور خود سے محبت (سیلف لو) کے حوالے سے کھل کر گفتگو کی ہے۔
نادیہ جمیل جو دھوپ میں ساون، میرے پاس پاس، دمسا، در شہوار، مجھے جینے دو اور جو بچھڑ گئے جیسے ڈراموں میں اپنی جاندار اداکاری کے لیے جانی جاتی ہیں، حال ہی میں نجی ٹی وی مارننگ شو میں شریک ہوئیں جہاں انہوں نے اپنی زندگی کے تجربات شیئر کیے۔
گفتگو کے دوران انہوں نے کہا کہ میں اس سال 54 برس کی ہو جاؤں گی اور مجھے اپنی عمر پر فخر ہے، میں خدا کا شکر ادا کرتی ہوں کہ میں اس عمر تک پہنچی، کیونکہ آج کے دور میں عمر کا بڑھنا بھی ایک کامیابی ہے۔
انہوں نے کہا کہ خواتین کو خود سے محبت کرنا سیکھنا چاہیے اور اپنی ذات کے ساتھ مضبوط تعلق قائم کرنا چاہیے، انسان کی اصل ضرورت محبت ہے جو صرف خدا ہی پوری کر سکتا ہے۔
نادیہ جمیل کا کہنا ہے کہ رشتے ضرورت کی بنیاد پر نہیں بلکہ محبت اور احترام پر قائم ہونے چاہئیں اور یہ اسی وقت ممکن ہے جب انسان خود کو عزت اور محبت دے۔
اداکارہ کے اس پیغام کو سوشل میڈیا پر خوب سراہا جا رہا ہے، جہاں مداح ان کی مثبت سوچ اور حوصلے کو خراجِ تحسین پیش کر رہے ہیں۔
