فرمان الہی
نماز کے اوقات
بھارتی کامیڈین اور اداکار کپل شرما نے’ورلڈ لافٹر ڈے‘ پر پاکستان کے لیجنڈری کامیڈین امان اللّٰہ خان کو خراجِ عقیدت پیش کیا ہے۔
کپل شرما نے اپنے ورلڈ لافٹر ڈے اسپیشل شو میں اسٹینڈ اپ کامیڈین سمے رائنا اور یوٹیوبر رنویر الہٰ آبادیہ کا انٹرویو کرتے ہوئے مرحوم پاکستانی لیجنڈ امان اللّٰہ خان کو یاد کیا۔
اُنہوں نے امان اللّٰہ خان کو خراجِ عقیدت پیش کرتے ہوئے کہا کہ ایک بار لیجنڈری امان اللّٰہ خان نے مجھ سے کہا تھا کہ مقابلہ عام طور پر ہیرو اور ہیروئن کے درمیان ہوتا ہے۔
بھارتی کامیڈین نے بتایا کہ امان اللّٰہ خان کا کہنا تھا کہ ہم کامیڈین تو بڑا کام کر رہے ہیں، ہم سب کے چہروں پر مسکراہٹ لاتے ہیں اور ہمیں ہمیشہ اس پر ہی توجہ دینی چاہیے، اب ہم میں سے کچھ کی کامیڈی سے لوگوں کو تھوڑی زیادہ ہنسی آ جاتی ہے اور کچھ کی کامیڈی پر تھوڑی کم آتی ہے لیکن مسکراہٹ کم ہو یا زیادہ، مسکراہٹیں پھیلانا کام تو عمدہ ہی ہے ناں۔
کپل شرما کی امان اللّٰہ خان کو خراجِ عقیدت پیش کرنے کی یہ ویڈیو سوشل میڈیا پر بھی وائرل ہو رہی ہے، جسے صارفین کی جانب سے بہت پسند کیا جا رہا ہے۔
واضح رہے کہ قہقہوں کے بادشاہ کہلائے جانے والے لیجنڈری کامیڈین امان اللّٰہ طویل علالت کے بعد 2020ء میں خالقِ حقیقی سے جا ملے تھے۔
