فرمان الہی
نماز کے اوقات
پھلوں کے جوس کو طویل عرصے سے صحت بخش سمجھا جاتا رہا ہے، لیکن حالیہ برسوں میں چینی کی زیادہ مقدار کی وجہ سے ماہرینِ صحت اسے موٹاپے اور دانتوں کی خرابی سے بھی جوڑتے ہیں۔
معروف برطانوی ماہرِ غذائیت روب ہابسن کا کہنا ہے کہ جوس پینے میں سب سے اہم چیز اس کی مقدار ہے۔ ہمیں روزانہ 150 ملی لیٹر سے زیادہ جوس نہیں پینا چاہیے اور اسے ہمیشہ کھانے کے ساتھ لینا چاہیے تاکہ خون میں شوگر یکدم نہ بڑھے۔
ماہرین نے مختلف پھلوں کے جوسز کے حیران کن فوائد اور ان کے پوشیدہ نقصانات درج ذیل بتائے ہیں:
1۔ انار کا جوس (کولیسٹرول اور دل کے لیے)
انار میں 'پولی فینولز' نامی طاقتور اینٹی آکسیڈنٹس ہوتے ہیں جو شریانوں کو بند ہونے سے روکتے ہیں۔ طبی تحقیقات کے مطابق باقاعدگی سے انار کا جوس پینے سے خراب کولیسٹرول (LDL) اور بلڈ پریشر میں معمولی کمی آتی ہے۔
مارکیٹ سے ہمیشہ 100 فیصد خالص جوس لیں، کیمیکل یا چینی والے جوسز سے پرہیز کریں۔ اس میں قدرتی شوگر زیادہ ہوتی ہے، اس لیے مقدار کا خیال رکھیں۔
2۔ کرین بیری جوس (یو ٹی آئی انفیکشن کے لیے)
یہ جوس خواتین میں پیشاب کی نالی کے انفیکشن (UTI) کو روکنے میں 54 فیصد تک مددگار ثابت ہوا ہے اور اینٹی بائیوٹک ادویات کی ضرورت کو 59 فیصد تک کم کرتا ہے۔
تاہم خون پتلا کرنے والی دوا استعمال کرنے والے مریض کرین بیری جوس سے سخت پرہیز کریں، کیونکہ یہ جان لیوا ثابت ہو سکتا ہے۔
3۔ مالٹے کا جوس (قوتِ مدافعت اور ہڈیاں)
مالٹے کے جوس کا ایک کپ روزانہ وٹامن سی کی 130 فیصد ضرورت کو پورا کرتا ہے، جو سفید خلیات کو مضبوط بنا کر بیماریوں سے لڑتا ہے۔ یہ پودوں سے حاصل ہونے والے آئرن کو جسم میں جذب کرنے میں بھی مدد دیتا ہے۔
تاہم اس جوس سے متعلق ماہرین مشورہ دیتے ہیں کہ اس میں گودے والے جوس کا انتخاب کریں کیونکہ یہ زیادہ فائدہ مند ہوتا ہے۔
4۔ چیری کا جوس (پُرامید نیند اور پٹھوں کی بحالی)
کھٹی چیری کے جوس میں 'میلاٹونین' ہارمون ہوتا ہے جو نیند کے نظام کو بہتر بناتا ہے۔ انسولین یا بےخوابی کے مریض اگر روزانہ اس کا استعمال کریں تو ان کی نیند کا دورانیہ ایک گھنٹہ بڑھ جاتا ہے۔ ایتھلیٹس کے پٹھوں کے درد کو ٹھیک کرنے کے لیے بھی یہ بہترین ہے۔
5۔ چقندر کا جوس (دماغی صلاحیت اور بلڈ پریشر)
اس جوس میں موجود نائٹریٹس خون کی نالیوں کو آرام پہنچاتے ہیں، جس سے دماغ کے اگلے حصے میں خون کا بہاؤ بڑھتا ہے اور سوچنے، سمجھنے اور یادداشت کی صلاحیت بہتر ہوتی ہے۔
تاہم گردے کی بیماری، پتھری کے مریض یا بلڈ پریشر کی ادویات لینے والے افراد چقندر کے جوس سے دور رہیں کیونکہ اس میں وٹامن کے (Vitamin K) زیادہ ہوتا ہے۔
6۔ سیب کا جوس (دل کی صحت)
فلٹر شدہ صاف جوس کے بجائے ہمیشہ دھندلا یا گدلا سیب کا جوس پییں، کیونکہ اس میں گودا اور پودوں کے غذائی اجزاء زیادہ برقرار رہتے ہیں جو دل کو فائدہ پہنچاتے ہیں۔
7۔ چکوترا یعنی گریپ فروٹ جوس (وزن میں کمی)
خواتین میں یہ جوس وزن گھٹانے، بی ایم آئی (BMI) کو کنٹرول کرنے اور اچھے کولیسٹرول (HDL) کو بڑھانے میں مددگار ثابت ہوا ہے۔
تاہم اس حوالے سے ماہرین سخت وارننگ دیتے ہیں کہ اگر آپ بلڈ پریشر، ڈپریشن، نیند یا کولیسٹرول کی ادویات لے رہے ہیں، تو گریپ فروٹ جوس ہرگز نہ پییں، کیونکہ یہ جگر کے انزائمز کو بلاک کر کے ادویات کو خون میں خطرناک حد تک بڑھا دیتا ہے۔
نوٹ: یہ ایک معلوماتی مضمون ہے، اپنی کسی بھی بیماری کی تشخیص اور اس کے علاج کےلیے ڈاکٹر سے رجوع کریں۔
