عمران نے بشریٰ بی بی کو شادی کی پیشکش کی ہے، پی ٹی آئی

پاکستان تحریک انصاف نے عمران خان کی تیسری شادی کی تردید کر تے ہوئے کہا ہے کہ عمران خان نے بشریٰ بی بی کو ابھی صرف شادی کی پیشکش کی ہے۔

تحریک انصاف کے جاری کردہ اعلامیہ کے مطابق بشریٰ بی بی نے عمران خان کی اس پیشکش پر حتمی جواب دینے کے لیے وقت مانگا ہے۔

ذرائع کے مطابق بشریٰ بی بی نے کہا ہے کہ وہ خاندان سے مشاورت کے بعد فیصلہ کریں گی۔

تحریک انصاف کے مطابق اگر بشریٰ بی بی نے شادی کی پیشکش قبول کی تو عمران خان اس بات کا باضابطہ اعلان کریں گے۔

اس موقع پر تحریک انصاف نے میڈیا سے درخواست کی ہے کہ وہ دونوں خاندانوں کی نجی زندگی کا خیال رکھیں۔

دوسری جانب دی نیوز کے صحافی عمر چیمہ کا پروگرام ’لیکن‘ میں گفتگو کرتے ہوئے کہنا تھا کہ وہ سو  نہیں، دو سو فیصد پراعتماد ہیں کہ عمران خان نے تیسری شادی کر لی ہے اور یہ شادی بشریٰ بی بی کے ساتھ ہی ہوئی ہے۔