گورنر ہاؤس سندھ شہریوں کیلئے کھل گیا

گورنرسندھ عمران اسماعیل کی ہدایت پر کراچی میں واقع گورنر ہاؤس سندھ کا مخصوص حصہ عوام کے لیے آج 7 ستمبر 2018ء کی صبح سے کھول دیا گیا ہے۔

گورنر ہاؤس کے مخصوص حصے میں واقع پارک میں شہریوں کی آمد کا سلسلہ شروع ہوگیا ہے، اس موقع پر سیکیورٹی کے سخت انتظامات کیے گئے ہیں۔

شہریوں کی گورنر ہاؤس آمد کے موقع نو منتخب گورنر سندھ عمران اسماعیل نے شہریوں سے ملاقات بھی کی۔

گزشتہ روز گورنر سندھ کی جانب سے گورنرہاؤس میں شہریوں کے داخلے کی ہدایات جاری کردی گئی تھیں۔

اس سلسلے میں جاری کیے گئے اعلامیے کے مطابق شہری گیٹ نمبر ایک سے شناخت کے بعد گورنر ہاؤس میں داخل ہوسکیں گے، گورنر ہاؤس میں گروپ کی صورت میں داخلے کے لیے پیشگی تحریری درخواست دے کر اجازت حاصل کرنی ہوگی۔

اعلامیے میں کہا گیا ہے کہ شہری روزانہ صبح 6 بجے سے 10 بجے تک گورنر ہاؤس آ سکتے ہیں، جبکہ اتوار کے روز شام 4:30 سے 6:30 بجے تک ہوگا ۔

اعلامیے میں مزید کہا گیا ہے کہ چونکہ گورنرہاؤس قومی اثاثہ ہے اس لئے اس کی دیکھ بھال ہم سب کی ذمہ داری ہے، گورنرہاؤس کی املاک کو نقصان پہنچانا قانوناً جرم ہوگا ۔

اعلامیے میں یہ بھی کہا گیا ہے کہ کسی بھی ہنگامی صورت میں جگہ خالی کرائی جا سکتی ہے، طلب کرنے پر مذکورہ فرد کو اپنی شناخت کروانا ہوگی جبکہ اس دوران نگہبان کیمرے بھی کام کررہے ہوں گے۔

اس سے قبل اس حوالے سے گورنر ہاؤس میں میڈیا سے بات چیت کرتے ہوئے گورنر سندھ عمران اسماعیل کا کہنا تھا کہ گورنر ہاؤس کی عمارت تاریخی ہے اور یہاں نایاب اشیاء موجود ہیں جبکہ شہری گورنر ہاؤس کے پارک میں بھی گھوم پھر سکیں گے۔

انہوں نے مزید کہا تھا کہ میں صرف گورنر ہاؤس کے 2 کمرے اور ایک گاڑی استعمال کر رہا ہوں جبکہ پہلے 40 گاڑیاں گورنر کے پروٹوکول میں ہوتی تھیں۔

واضح رہے کہ وزیر اعظم عمران خان نے الیکشن سے قبل اعلان کیا تھا کہ اگر ان کی حکومت بن گئی تو تمام گورنر ہاؤسز کو فلاحی کاموں کے لیے استعمال میں لائیں گے۔