نیب کی پریس ریلیز پر مریم اورنگزیب کا رد عمل

ترجمان مسلم لیگ ن مریم اورنگزیب نے نیب پریس ریلیز پر ردعمل دیتے ہوئے کہا ہے کہ شاہد خاقان عباسی کی پریس کانفرنس کے بعدنیب بوکھلاہٹ کا شکار ہے۔

مریم اورنگزیب نے کہا کہ چیئرمین نیب جھوٹے انٹرویو کو سچ ثابت کرنے کے لیے سو جھوٹ بول رہے ہیں وہ اپنے ادارے کی تردید کے پیچھے نہ چُھپیں۔

انہوں نے کہا کہ اگر کالم نگار کا کالم سچ نہیں تو چیئرمین نیب عوام کے سامنے اس کی تردید کریں اور اگر یہ کالم سچ ہے تو اس کے ثبوت پیش کیے جائیں۔

مریم اورنگزیب کا مزید کہنا تھا کہ چیئرمین نیب میڈیا کے ذریعے سیاستدانوں کی پگڑیاں اُچھال سکتے ہیں تو میڈیا ہی کے ذریعے عوام کے سامنے وضاحت بھی کریں، شاہد خاقان عباسی کی پریس کانفرنس کے بعد نیب بوکھلاہٹ کا شکار ہے۔

دوسری جانب وزیر اعظم کی معاون خصوصی برائے اطلاعات فردوس عاشق اعوان کا کہنا تھا کہ چیئرمین نیب کے انٹرویو سے متعلق خود نیب کو وضاحت دینی چاہیے، اگر وضاحت نہیں آئے گی تو غلط خبریں پھیلیں گی۔

انہوں نے کہا کہ اپوزیشن بھی نیب کو دھمکیاں دینے کے بجائے اپنے اوپر لگے الزامات کا جواب دے کیونکہ نیب سے چھپن چھپائی کھیلنا مسئلے کا حل نہیں ہے۔

چیئرمین نیب کے انٹرویو پر شاہد خاقان کی تنقید

سابق وزیراعظم شاہد خاقان عباسی نے چیئرمین قومی...

واضح رہے کہ گزشتہ روز مسلم لیگ (ن) کے سینئر نائب صدر شاہد خاقان عباسی نے پریس کانفرنس کرتے ہوئے چیئرمین نیب جاوید اقبال کے انٹرویو پر سخت تنقید کی اور کہا کہ نیب کا ایک ہی مقصد ہے کہ سیاستدان کو بدنام کیا جائے اور ان پر بے بنیاد الزام لگائے جائیں۔