شنیرا اکرم طبی عملے کے والدین کی شُکرگزار

11 مئی ، 2020

قومی کرکٹ ٹیم کے سابق کپتان وسیم اکرم کی اہلیہ اور سماجی کارکن شنیرا نے مائیکرو بلاگنگ سائٹ ٹوئٹر پر جاری کردہ اپنے پیغام میں اُن والدین کا شکریہ ادا کیا جن کے بچے طبی عملے سے وابستہ ہیں۔

ٹوئٹر پر جاری کردہ اپنے پیغام میں شنیرا اکرم نے کورونا کے خلاف جنگ میں اپنی جان خطرے میں ڈال کر قوم کی حفاظت کرنے والے فرنٹ لائن ہیروز کے والدین کا شکریہ ادا کرتے ہوئے لکھا کہ ’میں اُن والدین کی شُکر گزار ہوں جنہوں نے اپنے بیٹے اور بیٹیوں کو ڈاکٹر، نرسوں اور دیگر طبی عملے کی تعلیم دلوائی تاکہ وہ ہماری جان بچا سکیں۔‘

شنیرا اکرم نے لکھا کہ ’آج آپ کے بیٹے اور بیٹیاں ملک کو بچانے میں ایک اہم کردار ادا کر رہے ہیں۔‘

شنیرا کے اِس ٹوئٹ کے جواب میں آمنہ صدیقی نامی ٹوئٹر صارف نے لکھا کہ ’ڈاکٹرز اور دیگر طبی عملے کے والدین ہر لمحہ اپنے بچوں کی زندگیوں کے لیے پریشان اور بےچین رہتے ہیں، اُن کو کسی کا کوئی سلام یا خراج تحسین نہیں چاہیے، وہ صرف اپنی اولاد کا تحفظ چاہتے ہیں۔‘

ٹوئٹر صارف کےاِس جواب پر شنیرا نے اُن کو پُرسکون انداز میں سمجھاتے ہوئے لکھا کہ ’ہر والدین اپنی اولاد کا تحفظ چاہتے ہیں لیکن والدین کی زندگی میں ایک وقت ایسا بھی آتا ہے جب وہ پیچھے ہٹ جاتے ہیں اور اپنے بچوں کو بڑے ہوکر کامیاب انسان بننے کی ترغیب دیتے ہیں۔‘

اُنہوں نے لکھا کہ ’جب ہمارے بچے کسی کی جان بچانے والے کامیاب انسان بن جاتے ہیں تو والدین کے لیے اِس سے زیادہ فخر کی کوئی بات نہیں ہوتی۔‘

یاد رہے کہ اِس سے قبل شنیرا اکرم نے اپنی ایک انسٹاگرام پوسٹ میں ڈپریشن سے بچاؤ کا طریقہ بتاتے ہوئے کہا تھا کہ روزانہ کچھ دیر ورزش کی جائے تو ڈپریشن اور بے چینی سے بچا جا سکتا ہے۔

تازہ ترین