صرف 2 روپے نہ ہونے پر امیتابھ من پسند کام نہ کرسکے

01 اکتوبر ، 2020

امیتابھ کی زندگی میں کروڑوں کی نہیں بلکہ 2 روپے کی اہمیت زیادہ ہے

ہندی سنیما کے لیجنڈری اداکار امیتابھ بچن کے لیے کروڑوں روپے سے زیادہ دو روپے کی اہمیت ہے۔

حال ہی میں ٹی وی شو کون بنے گا کروڑ پتی میں انھوں نے اپنے بچن اور اس دوران اپنی غربت کا کھل کر اظہار کیا۔

شو کے ایک امیدوار نے جب بتایا کہ وہ اپنے بچپن میں 7 روپے کا اسنیکس بھی نہیں خرید سکتے تھے، تو اس پر امیتابھ نے اپنے بچپن کی روداد سنائی۔

ہندی سنیما کو پے درپے ہٹ فلمیں دینے والے بالی ووڈ کے شہنشاہ نے اپنے بچپن کی غربت کا ایک واقعہ سنایا۔

انھوں نے کہا کہ وہ اسکول کی کرکٹ ٹیم میں شامل ہونا چاہتے تھے جس کے لیے 2 روپے درکار تھے، تاہم وہ یہ کام اس وجہ سے نہیں کر سکے کیونکہ ان کے پاس اتنے پیسے بھی موجود نہیں تھے۔

امیتابھ نے بتایا کہ ان کی والدہ تیجی بچن نے انھیں یہ کہا کہ ہمارے پاس پیسے نہیں ہیں۔

ورسٹائل اداکار نے کہا کہ اس واقعے نے ہمیں اہم سبق سکھادیا تھا، اور ’یہ 2 روپے کی کیا اہمیت ہے، وہ آج ہمیں یاد آتا ہے۔‘

واضح رہے کہ معروف اداکار ٹی وی کوئز شو کون بنے گا کروڑ پتی کے 12ویں سیزن کی بھی میزبانی کر رہے ہیں۔

تازہ ترین