’موبائل ریڈی ایشن سے بچنے کیلئے گوبر کا استعمال کریں‘، بھارتی وزیر

13 اکتوبر ، 2020

موبائل ریڈی ایشن کم کرنے کیلئے گوبر کی چپ بنانے کا فیصلہ

بھارتی حکومت کے نمائندے کی جانب سے موبائل فون ریڈی ایشن سے بچنے کے لیے گائے کے گوبر سے تیار کی گئی چپ کا استعمال تجویز کیا گیا ہے۔

ہر آنے والے دن بھارت سے کوئی نہ کوئی انوکھی خبر آتی رہتی ہے جسے سننے کے بعد انسانی عقل دنگ رہ جاتی ہے، ہندو مذہب میں گائے کو ماں کا درجہ دیا جاتا ہے مگر بھارتیوں کو گائے اور اس کے گوبر سے کچھ خاص ہی لگاؤ ہے، اپنے دیوتاؤں کی مورتیاں گوبر سے بنانے کے بعد اب فون سِگنل ریڈی ایشن کے نقصانات سے بچنے کے لیے گوبر کی چپ تیار کر لی گئی ہے۔

اسی سلسلے میں بھارتی جماعت راشٹریہ کمدھینو ایوگ کے چیئر مین ولبھ بھائی کتھیریا کی جانب سے ایک پریس کانفرنس کی گئی۔

اس دوران ولبھ بھائی کتھیریا نے گائے کے گوبر کے کرشمات بتاتے ہوئے کہا کہ گائے کا گوبر اینٹی ریڈی ایشن ہے جس سے بنی اشیا کے استعمال سے مضر صحت ریڈی ایشن سے بچا جا سکتا ہے۔

بھارت میں اس وقت ایک مہم ’کمدھینو دیپ والا ابھیان‘ کا آغاز کیا جا رہا ہے جس کا مقصد بھارتیو ں میں گائے کے گوبر کی افادیت سے متعلق شعور اجاگر کرنا اور اس سے بنی اشیا کے استعمال کو بڑھاوا دینا ہے۔

اس مہم سے متعلق پریس کانفرنس کے دوران چیئر مین ولبھ بھائی کتھیریا نے مزید کہا کہ ’گائے کا گوبر سب کی حفاظت کرے گا، گوبر اینٹی ریڈی ایشن ہے اور یہ بات سائنسی تحقیق سے تصدیق شدہ ہے۔‘

ولبھ بھائی کتھیر نےگوبر سے بنی موبائل چپ کی تشہیر کرتے ہوئے کہا کہ ’گوبر سے بنی یہ چپ موبائل فون سے خا رج ہونے والی مضر صحت ریڈ ی ایشن سے بچائے گی، یہ چپ موبائل فون میں استعمال کی جا سکتی ہے، جو افراد بیماریوں سے بچنا چاہتے ہیں اس چپ کا استعمال کریں، یہ بیماریوں سے حفاظت فراہم کرے گی۔‘