مسکن چورنگی دھماکا: درجنوں آشیانے تباہ ہوگئے

کراچی کے علاقے گلشن اقبال مسکن چورنگی پر واقع عمارت میں ہونے والے دھماکے کے رہائشی اپنا بچا کچا سامان تباہ حال عمارت سے اپنی مددآپ کے تحت باہر نکالتے رہے۔ متاثرین کہتے ہیں ان کے آشیانے مکمل تباہ ہوگئے، زندگی بچ گئی یہ ایک معجزہ ہے۔

مسکن چورنگی پر واقع اللّٰہ نور اپارٹمنٹ کے مکین دھماکے کے بعد مخدوش قرار دی جانے والی عمارت سے اپنی قیمتی اشیا نہایت احتیاط کے ساتھ باہر نکالتے رہے، پائی پائی جوڑ کر بنائے گئے گھر اب رہائش کے قابل نہیں رہے، زیادہ تر افراد وہاں سے نقل مکانی کرچکے ہیں۔

مسکن دھماکا: زخمیوں کے علاج کے لیے 50 ہزار جمع کرانے کا مطالبہ

ابوالحسن اصفہانی روڈ پر مسکن چورنگی پر نجی بینک میں ہونے والے دھماکے سے متعدد افراد ہلاک و زخمی ہوئے،قریبی نجی اسپتال میں زخمیوں کو لے جایا گیا ، لیکن اہل خانہ کی جانب سے یہ شکایات آئیں کہ طبی امداد سے قبل ان سے رقم طلب کی جارہی ہے ۔

دھماکے کے بعد عمارت کے کمپاؤنڈ میں مکین ایک دوسرے کا دکھ بانٹتے رہے ۔

خالد سلطان کا گھر دھماکے سے شدید متاثر ہوا، وہ خود خالق حقیقی سے جاملے ان کے بیوی بچے دھماکے کے وقت اسکول میں تھے جو، اللّٰہ کے کرم سے محفوظ رہے۔

متاثرین بتاتے ہیں کہ دھماکہ بہت شدید تھا، جس میں 20 سے 25 فلیٹ مکمل تباہ ہوگئے، جس طرح کی تباہی ہوئی اس میں زندہ رہ جانا معجزہ ہے۔