PSL5، ملکی اور غیر ملکی کرکٹرز کیلئے سیکیورٹی پلان

کراچی میں منعقدہ پی ایس ایل فائیو میں شرکت کے لیے پہنچنے والے ملکی اور غیرملکی کھلاڑیوں کے لیے کراچی پولیس نے سیکیورٹی پلان ترتیب دے دیا ہے۔

پولیس ترجمان کے مطابق نیشنل اسٹیڈیم اور شہر کے ریڈ زون میں واقع ہوٹلوں اور ٹیموں کی آمدورفت کے روٹس پر پولیس کی بھاری نفری ٹیموں اور کھلاڑیوں کی سکیورٹی کے لیے موجود رہے گی۔

اس سلسلے میں کراچی پولیس کے 24 سینئر افسران سمیت 59 ڈی ایس پیز، 474 این جی اوز، 4275 ہیڈ کانسٹیبلز، کانسٹیبلزاور پولیس کی ریپڈ ریسپونس فورس کے 345 جوان متعین کیے گئے ہیں۔

پی ایس ایل فائیو، غیر ملکی کرکٹرز کی آمد کا سلسلہ شروع

پاکستان سپر لیگ (پی ایس ایل) کے باقی میچز کے لیے انٹرنیشنل کرکٹرز کی آمد کا سلسلہ شروع ہوگیا ہے۔

اسپیشل سکیورٹی یونٹ کے سربراہ ڈی آئی جی مقصود میمن کے مطابق ایس ایس یو 1018 کمانڈوز سیکورٹی کے خصوصی انتظامات کے لیے تعینات کیے گئے ہیں۔ ترجمان کے مطابق نیشنل اسٹیڈیم کراچی اور ہوٹلوں پر اسپیشل برانچ کے سادہ لباس اہلکاروں کی بڑی تعداد بھی سکیورٹی کے فرائض سر انجام دے رہی ہے۔

پولیس حکام کے مطابق ممکنہ غیرمعمولی صورتحال اور حالات و واقعات سے نمٹنےکے لیےاسپیشل سکیورٹی یونٹ کی ایس ڈبلیو اے ٹی ’سواٹ‘ ٹیمیں بھی ہمہ وقت فوری رسپاونس کے لیے تیار رہیں گی۔

ٹریفک پولیس نے پی ایس ایل فائیو میں شرکت کے لیے آنے والے ملکی اور غیر ملکی کھلاڑیوں کی نیشنل اسٹیڈیم کی طرف آمدورفت کے اوقات میں عوام کی سہولت کے لیے متبادل روٹس پلان پہلے ہی دیا جاچکا ہے۔ ترجمان کے مطابق کراچی کی روشنیوں کی بحالی کے لیے پولیس نے بڑی قربانیاں دی ہیں۔

انٹرنیشنل کھلاڑیوں کی آمد شہر میں امن و امان کے قیام کی دلیل ہے۔ کراچی پولیس عوام کے تحفظ اور قانون کی بالا دستی کے لیے ہر ممکن اقدامات اُٹھا رہی ہے۔