فرمان الہی
نماز کے اوقات
بالی ووڈ کے سینئر اداکار انیل کپور اپنے ساتھی اداکاروں کے کورونا وائرس ٹیسٹ مثبت آنے پر ممبئی واپس آگئے۔
بھارتی میڈیا رپورٹس کے مطابق انیل کپور اپنی نئی آنے والی فلم ’جُگ جُگ جیو‘ کی شوٹنگ کے سلسلے میں چندی گڑھ گئے ہوئے تھے جہاں اداکار سمیت اُن کے ساتھی اداکاروں کا کورونا وائرس ٹیسٹ کیا گیا۔
ہدایت کار راج مہتہ کی فلم’جُگ جُگ جیو‘ کی شوٹنگ میں شریک بالی ووڈ کی ماضی معروف ہیروئن اور آنجہانی رشی کپور کی بیوہ اداکارہ نیتو سنگھ کپور اور ورون دھون کا کورونا وائرس ٹیسٹ مثبت آیا جبکہ انیل کپور کے کورونا وائرس ٹیسٹ کے نتائج منفی آئے۔
ساتھی اداکاروں کے کورونا وائرس میں مبتلا ہونے کے بعد انیل کپور واپس ممبئی آگئے ہیں جبکہ اُن کی ممبئی ائیرپورٹ پر پہنچنے کی تصویریں سوشل میڈیا پر وائرل ہوگئی ہیں۔
انیل کپور کی وائرل ہونے والی تصویروں میں دیکھاجاسکتا ہے کہ اُنہوں نے سیاہ رنگ کی شرٹ اور جینز زیب تن کی ہوئی ہے جبکہ کورونا وائرس سے بچنے کے لیے چہرے پر ماسک بھی پہنا ہوا ہے اور اُس کے ساتھ ہی آنکھوں پر چشمہ بھی لگایا ہوا ہے۔
بالی ووڈ اداکار نے ممبئی پہنچنے پر ہاتھ کے اشارے سے مداحوں کو بتایا کہ خوش قسمتی سے وہ بالکل ٹھیک ہیں۔
یاد رہے کہ اس فلم کی پروڈکشن گزشتہ ماہ سے جاری تھی لیکن اس معاملے کے بعد اس فلم کی شوٹنگ اب ان اداکاروں کی صحت یابی تک ملتوی کردی گئی ہے۔
فلم’جُگ جُگ جیو‘ میں یو ٹیوبر پراجاکتا کولہی بھی کام کررہی ہیں جو کہ ان کی پہلی بالی ووڈ فلم ہوگی۔
