فرمان الہی
نماز کے اوقات
ارجنٹائن کے سابق فٹبالر ڈیاگو میراڈونا اپنی وفات کے بعد وراثت میں کئی قیمتی چیزیں چھوڑ کر گئے ہیں، ہم اُن کی ذاتی زندگی سے متعلق کئی چیزوں کا ذکر سنتے تھے لیکن اب اُن کی مالی وراثت کا مستقبل بھی پیچیدہ دکھائی دیتا ہے۔
غیر ملکی میڈیا رپورٹس کے مطابق ڈیاگو میراڈونا کی موت کے بعد سے اُن کے اثاثوں سے متعلق یہ قیاس آرائیاںکی جارہی ہیں کہ اُن کے وارثوں میں ان کی چیزوں کو تقسیم کرنا آسان نہیں ہے کیونکہ میراڈونا کا خاندان بہت بڑا ہے۔ چھ مختلف خواتین سے تعلقات کے بعد اُن کےآٹھ بچے ہیں۔ توقع ہے کہ اُن کی وراثت تمام بچوں میں برابر تقسیم کی جائے گی۔
ایسا لگتا ہے کہ اُن کی وراثت کی تقسیم سے قبل خاندانی جھگڑے ہوں گے، ڈی این اے ٹیسٹ اور ولدیت کے مزید دعوے سامنے آئیں گے لیکن ابھی تو وکلا میراڈونا کے کُل اثاثوں کی مجموعی قیمت کا تخمینہ ہی لگا رہے ہیں۔
میراڈونا کے بچے کتنے ہیں؟
کئی برسوں تک میراڈونا اپنی دو بیٹیوں 31 سالہ جیانینا اور 33 سالہ دالما کے علاوہ دیگر بچوں کی ولدیت سے انکار کرتے رہے۔ اُن بچوں کی والدہ میراڈونا کی سابقہ اہلیہ کلاؤڈیا ویلافین ہیں جن سے 20 سال شادی کے بعد انہوں نے 2003 میں طلاق لے لی تھی۔
اس کے بعد میراڈونا نے چھ مزید بچوں کی ولدیت کا اعتراف کر لیا تھا۔
سنہ 2010 کی دہائی میں انہوں نے 34 سالہ ڈیاگو جونیئر اور 24 سالہ جینا کو تسلیم کر لیا تھا لیکن اس کے لیے ان کی ماؤں کو میراڈونا سے عدالتی جنگ لڑنا پڑی تھی۔ ان خواتین کے ساتھ میراڈونا کے تعلقات رہے تھے۔
سال 2013 میں اُن کے دوسرے بیٹے سات سالہ ڈیاگو فرنینڈو کی پیدائش کے بعد کوئی جھگڑا ہوئے بغیر انہیں فوراً تسلیم کر لیا گیا تھا۔
پھر سال 2019 میں میراڈونا کے شائقین کو ایک اور حیرانی اس وقت ہوئی تھی جب ان کے وکیل نے اعلان کیا تھا کہ کیوبا میں ان کے مزید تین بچے ہیں۔ انہوں نے یہاں سنہ 2000 کے بعد کئی سال گزارے تھے ۔
اس کے بعد میراڈونا کے بچوں میں مزید دو بچوں کا اضافہ ہوا جن میں 19 سالہ لارا اور 23 سالہ گِل ہیں۔ دونوں کا ماننا ہے کہ میراڈونا اُن کے والد ہیں۔ دونوں کا کہنا ہے کہ وہ یہ ثابت کرنے کے لیے قانونی کارروائی کے لیے تیار ہیں۔ ایسا کرنے کے بعد ہی وہ میراڈونا کی وراثت میں سے اپنا حصہ لے سکیں گے۔
میراڈونا کی دولت کا کل تخمینہ کیا ہے؟
ارجنٹائن کے فٹبالر کی کل دولت یا اُن کےکل اثاثوں کی کوئی مجموعی فہرست کہیں شائع نہیں ہوئی۔میڈیا رپورٹس کے مطابق اس حوالے سے قیاس آرائی کی گئی ہے کہ اُن کی کل دولت کے تخمینے کے دو طریقے ہیں۔
پہلے طریقے میں میراڈونا کے اثاثوں کی کل قیمت کا اندازہ لگایا جاتا ہے۔ اس میں ان کی سپورٹس کاروں سے لے کر زیورات تک ہر چیز کی قیمت کا اندازہ لگایا جاتا ہے۔اس اندازے سے وراثت کی رقم سات کروڑ 50 لاکھ ڈالر سے لے کر لگ بھگ 10 کروڑ ڈالر بنتی ہے۔
دوسرے اندازے میں میراڈونا کے اثاثہ جات کو ان پر واجب الادا رقم سے منہا کیا جاتا ہے۔
معروف شخصیات کی دولت کا اندازہ لگانے والی ویب سائٹ سلیبریٹی نیٹ ورتھ کے مطابق میراڈونا کی کل مالیت پانچ لاکھ ڈالر تھی۔ ویب سائٹ کے مطابق وہ اس کا اندازہ مالی تجزیے، مارکیٹ میں تحقیق اور اندرونی ذرائع سے لگاتے ہیں۔
میراڈونا کے اثاثوں میں کیا چیزیں شامل ہیں؟
میڈیا رپورٹس کے مطابق ارجنٹائن میں اُن کی کم از کم پانچ جائیدادیںہیں، رولز رائلز کی گاڑی ’گھوسٹ‘ جس کی قیمت تین لاکھ 60 ہزار ڈالر ہے اور بی ایم ڈبلیو آئی ایٹ جس کی قیمت ایک لاکھ 75 ہزار ڈالر ہے۔
اُن کی ایک قیمتی گاڑی جو پانی میں تیر بھی سکتی ہے یہ انہیں بیلاروس میں تحفے میں دی گئی تھی،تین لاکھ 60 ہزار ڈالر کی ایک ہیرے کی انگوٹھی، ایک معاہدہ جس کے تحت ایک ویڈیو گیم کمپنی اپنی گیم میں اُن کے جیسا کھلاڑی دکھا سکتی ہے۔
اس کے علاوہ سلیبریٹی نیٹ ورتھ کے مطابق میراڈونا نے بطور کھلاڑی اور مینیجر اپنی تنخواہ اور اشتہارات سے کروڑوں ڈالر کمائے۔
ان کی وراثت کیسے تقسیم ہوگی؟
اپنی زندگی کے دوران میراڈونا کے اپنے سابقہ پارٹنرز اور بچوں سے لڑائی جھگڑے ہوتے رہے۔ ماضی میں تمام فریقین ٹی وی چینلوں اور سوشل میڈیا پر اپنے اعتراضات بتاتے رہے۔
میراڈونا کی صحت اور دولت دونوں چیزیں خبروں کی زینت بنتی رہیں۔ مثلاً نومبر 2019 میں میراڈونا نے اس وقت اپنی وراثت کا ذکر کیا جب ان کی بیٹی جیانینا نے سوشل میڈیا پر ان کی خراب صحت کے بارے میں بتایا۔
ایک یوٹیوب ویڈیو میں میراڈونا نے کہا تھا کہ’میں آپ کو بتا رہا ہوں کہ اگر میں کچھ پیچھے چھوڑ کر جاؤں گا تو سب عطیہ کر دوں گا۔‘
ارجنٹائن کے قانون کے مطابق ایک شخص اپنی وصیت میں صرف ایک تہائی دولت پہلے سے تقسیم کرسکتا ہے۔ باقی دولت ان کے بیوی بچوں کو منتقل کی جاتی ہے۔
چونکہ ایسا لگتا ہے کہ موت کے وقت میراڈونا کی نہ کوئی وصیت تھی نہ بیوی، اس لیے ان کی مجموعی دولت تمام بچوں میں برابر بانٹی جائے گی۔
