بلاول نےآج بھٹو کا نظریہ بھی دفن کر دیا، فیاض الحسن چوہان

وزیرِ جیل خانہ جات پنجاب فیاض الحسن چوہان کا پاکستان پیپلز پارٹی  کے چیئرمین بلاول بھٹو زرداری سے متعلق کہنا ہے کہ بلاول نے آج بھٹو کا نظریہ بھی دفن کر دیا ہے۔

فیاض الحسن چوہان نے اپوزیشن جماعتوں کے ایک پیچ پر جمع ہونے سے متعلق اپنے بیان میں کہا ہے کہ نون لیگ، پی پی کی محبت ’آسمان کا تھوکا منہ پر‘ کی مثال ہے، بلاول بھٹو زرداری نے آج گڑھی خدا بخش میں بھٹو کے ساتھ ان کا نظریہ بھی دفن کر دیا۔

فیاض چوہان نے کہا ہے کہ پیپلز پارٹی کے نظریاتی، سیاسی مخالفین جیالوں کو جمہوریت پر بھاشن دیں گے، بیگم صفدر اعوان کے والد بینظیر بھٹو شہید کو سیکیورٹی رسک قرار دیتے رہے ہیں۔

بینظیر بھٹو کی برسی، جلسہ کچھ دیر میں شروع ہو گا

گڑھی خدا بخش میں سابق وزیرِ اعظم محترمہ بے نظیر بھٹو شہید کی برسی کا جلسہ کچھ دیر میں شروع ہو گا، جلسہ گاہ میں کارکنوں کی آمد کا سلسلہ جاری ہے۔

مریم کی خواہش دیکھیں وزیرِاعظم بننا چاہتی ہیں، فواد چوہدری

وفاقی وزیر برائے سائنس و ٹیکنالوجی فواد چوہدری کا کہنا ہے کہ اسلامی مملکت پاکستان کی وزارتِ عظمیٰ کیا انٹرن شپ ہے؟ وزارتِ عظمیٰ کسی کے لیے انٹرن شپ نہیں ہوسکتی، مریم کی خواہش دیکھیں وزیرِاعظم بننا چاہتی ہیں۔

انہوں نے مزید کہا ہے کہ نون لیگ، پیپلز پارٹی کی ایک دوسرے کے لیے محبت "آسمان کا تھوکا منہ پر" کی تشریح ہے۔

دوسری جانب وزیرِاعلیٰ پنجاب عثمان بزدار کی معاونِ خصوصی فردوس عاشق اعوان کا کہنا ہے کہ گڑھی خدا بخش میں آج سیاسی تھیٹر لگایا جا رہا ہے۔

بھٹو کے اصل وارث دربدر ہیں، فردوس عاشق اعوان

وزیراعلیٰ پنجاب کی معاون خصوصی ڈاکٹر فردوس عاشق اعوان کہتی ہیں کہ بھٹو کے اصل وارث دربدر ہیں، بھٹو کے حقیقی ورثے کو حق نہ دینے والے سندھ کے عوام کو کیا انصاف دیں گے۔

فردوس عاشق اعوان نے کہا ہے کہ اجتماع نے وزیرِ اعظم عمران خان کی 2018ء کی بات پر مہرِ تصدیق لگادی ہے، یہ آج ایک دوسرے کے مفادات کے تحفظ کے لیے پھر نکلے ہیں۔