ہمارے پیارے چلے جاتے ہیں اور یادیں چھوڑ جاتے ہیں، ایمن خان

05 جنوری ، 2021

پاکستان شوبز انڈسٹری کی معروف اداکارہ ایمن خان نے اپنے مرحوم والد کی یاد میں سوشل میڈیا پر اُن کے لیے خصوصی پیغام جاری کیا ہے۔

ایمن خان نے سوشل میڈیا سائٹ انسٹاگرام پر اسٹوری میں اپنے والد کی ایک یادگار تصویر شیئر کی جس میں وہ پاکستان کے پہاڑی علاقے میں موجود ہیں۔

اداکارہ نے تصویر شیئر کرتے ہوئے لکھا کہ ’ہم سب کی زندگی میں ایک ایسا مقام آتا ہے کہ جب انسان بےبس ہوجاتا ہے۔‘

ایمن خان نے کہا کہ ’اُس وقت انسان نہ تو اپنے پیارے کے ساتھ جاسکتا ہے اور نہ ہی اُسے اپنے پاس روک سکتا ہے۔‘

اُنہوں نے مزید کہا کہ ’بس یادیں، بےبسی اور غم رہ جاتا ہے۔‘

واضح رہے کہ والد کے انتقال پر ایمن خان نے اپنے انسٹا پیغام میں لکھا تھا کہ والد ہمیشہ ہمارے دلوں میں زندہ رہیں گے، وہ ایک مضبوط انسان تھے، آپ لوگ ان کے لیے دعا کریں۔

ایمن خان نے انسٹاگرام پر تین اسٹوریز شیئر کی تھیں ایک میں انہوں نے اپنے مداحوں کو بتایا کہ میرے والد مبین خان کا انتقال ہوگیا ہے، وہ ایک مضبوط انسان تھے، آپ سب سے اُن کے لیے دعاؤں کی درخواست ہے۔

اداکارہ نے دوسری اسٹوری میں اپنے والد کے ہمراہ تصویر شیئر کرتے ہوئے لکھا تھا کہ آپ ہمیشہ ہمارے دلوں میں زندہ رہیں گے، ہم آپ سے بہت محبت کرتے ہیں جبکہ تیسری اسٹوری میں فیملی فوٹو تھی۔

یاد رہے کہ 2020 کے آخری دن یعنی 31 دسمبر کو اداکاراؤں(منال اور ایمن) کے والد مبین خان کا انتقال ہوا تھا۔