آپ آف لائن ہیں
جمعرات12؍رجب المرجب 1442ھ25؍فروری 2021ء
  • بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

سراج الحق کی گورنر ہاؤس چھوڑنے کیلئے عمران اسماعیل کو 50 لاکھ روپے کی آفر


امیر جماعت اسلامی پاکستان سینیٹر سراج الحق نے گورنر سندھ عمران اسماعیل کو 50 لاکھ روپے کی آفر کردی۔

اسٹیل ٹاؤن کراچی میں ملازمین کے دھرنے سے خطاب میں سراج الحق نے کہا ہے کہ گورنر سندھ کہتے ہیں ہم نے ہر مزدور کو 5 لاکھ روپے ادا کیے ہیں۔

انہوں نے گورنر عمران اسماعیل کو مخاطب کرتے ہوئے کہا کہ ہم آپ کو 50 لاکھ روپے دیتے ہیں، آپ گورنر ہاؤس چھوڑ دیں۔


امیر جماعت اسلامی نے مزید کہا کہ کرپٹ حکمرانوں کی وجہ سے ادارے تباہ و برباد ہوگئے، پاکستان اسٹیل مل ایشیا کا سب سے بڑا ادارہ تھا، معیشت میں اس کا اہم کردار تھا۔

ان کا کہنا تھاکہ ظالم درندوں اور کرپٹ حکمرانوں کی وجہ سے آج اسٹیل مل تباہ و برباد ہوگیا۔

سراج الحق نے یہ بھی کہا کہ حکومت کو چاہیے تھا کہ ادارے کی ناکامی کے ذمے داران کے خلاف تحقیقات کرتی۔

انہوں نے کہا کہ موجودہ حکمرانوں نے مظلوم ملازمین کو بے روزگار کیا اور کھلے آسمان تلے چھوڑ دیا۔

امیر جماعت اسلامی نے مزید کہا کہ ہم نے پاکستان اسٹیل مل سے متعلق سینیٹ میں قرارداد پیش کی، سینٹ میں سوالات اٹھائے، جس پر بیوروکریسی اور حکومت جوابات نہ دے سکی۔

اُن کا کہنا تھا کہ جماعت اسلامی پاکستان اسٹیل مل کے مزدوروں کے پشت پر موجود ہے، وزیر اعظم عمران خان بتائیں کہ قوم کے نوجوان کیوں بے روزگار ہیں۔

سراج الحق نے یہ بھی کہا کہ آج ملک میں ظلم کا نظام قائم ہے، ہزاروں ملازمین کو بے روزگار کردیا گیا ہے، پی ٹی آئی حکومت نے قوم سے وعدہ کیا تھا کہ ایک کروڑ ملازمتیں دیں گے۔

انہوں نے کہا کہ حکومت آنے کے بعد برسرروزگار سے ہی روزگار چھین لیا گیا، اسٹیل مل ملازمین نے اپنی ساری زندگی وقف کردی، آج انہیں بے روزگار کردیا گیا۔

قومی خبریں سے مزید