بینائی تیز کرنے والی غذائیں

تازہ ترین

صحت

29 جنوری ، 2021

عمومی صحت کی بہتری کے لیے اچھی غذا کا استعمال تو بے حد ضروری ہے ہی لیکن کچھ غذائیں ایسے وٹامنز پر مشتمل ہوتی ہیں، جو آپ کی قوت بصارت کوبہتر بناتی ہیں۔ آنکھیں قدرت کا انمول تحفہ ہیں، لیکن بعض افراد اس کی صحت مندی پر بالکل دھیان نہیں دیتے، جس کی وجہ سے ان کی آنکھیں جلد خراب ہوجاتی ہیں۔

وہ غذائیں جن سے آنکھوں کی بینائی تیز ہوسکتی ہے:

مچھلی

مچھلی میں پائے جانے والے اومیگا3 (چکنائی) کے بارے میں تو آپ نے اکثر سنا ہوگا کہ یہ کولیسٹرول کو کم کرنے میں معاون ثابت ہوتا ہے لیکن کیا آپ جانتے ہیں کہ یہ آنکھوں کے اعصاب کو مضبوط اور خشک آنکھوں جیسی بیماریوں سے بھی محفوظ رکھتا ہے۔

ڈاکٹرز سختی سے ہدایت کرتے ہیں کہ ایسی خوراک استعمال کی جائے جس میں اومیگا 3 پایا جاتا ہو کیوں کہ یہ آنکھوں کے امراض کو کم کرنے میں نہایت سود مند ثابت ہوتا ہے۔

گاجر

گاجر میں شامل وٹامن اے آنکھوں کی صحت کےلیے نہایت مفید ہے اور ایک گاجر میں اوسطاً 5 ہزار ملی گرام وٹامن اے ہوتا ہے۔ وٹامن اے نہ صرف آنکھوں بلکہ قوت مدافعت اور جلد کی صحت کے لیے بھی نہایت فائدہ مند ہے۔

ماہرین کے مطابق روزانہ ایک گلاس گاجر کے جوس کا استعمال آپ کو بینائی سے محفوظ رکھ سکتا ہے۔ گاجر میں وٹامن اے، پوٹاشیم، کاربوہائیڈریٹ اور ریشے پائے جاتے ہیں جو بینائی کو تیز کرنے میں مدد گار ثابت ہوتے ہیں۔

زیتون کا تیل

زیتون کا تیل وٹامنز اور اینٹی آکسیڈنٹس سے بھرپور ہوتا ہے،اسی وجہ سے زیتون کا تیل آنکھوں کی صحت کی بہتری اور نظر کو طاقت ور بنانے کی صلاحیت رکھتا ہے۔

پھول گوبھی، بند گوبھی اور شملہ مرچ

یہ سبزیاں وٹامن سی کی اچھی خاصی مقدار پر مشتمل ہوتی ہیں، جو نہ صرف قوت مدافعت بلکہ بصارت کو بڑھانے میں بھی نہایت معاون ثابت ہوتی ہیں۔

پالک

پالک ایسی سبزی ہے، جس میں آئرن اور وٹامن سی کی بہت بڑی مقدار ہوتی ہے، جو آپ کی آنکھوں کے لیے سن اسکرین (دھوپ کے مضر اثرات سے بچانے والی کریم) کا کام کرتی ہے۔

فیل مرغا (عام مرغوں کی نسبت بہت بڑا ہوتا ہے)

فیل مرغا میں شامل زنک قوت بصارت کی حفاظت اور اعصابی نظام کی مضبوطی کے لیے نہایت اہم ہے لیکن اس کی زیادتی مسائل کا شکار بھی کر سکتی ہے۔