فرمان الہی
نماز کے اوقات
فیصل آباد( نمائندہ جنگ) وزیر خارجہ شاہ محمود قریشی نے کہا ہے کہ فیڈمک کے اکنامک زونز میں سرمایہ کاری کے لئے بیرون ممالک موجود سفارتخانے فیڈمک کی بھرپور معاونت کریں گے۔ وہ فیڈمک کے ایم تھری انڈسٹریل سٹی اور علامہ اقبال انڈسٹریل سٹی کے دورے کے موقع پر چیئرمین فیڈمک میاں کاشف اشفاق سے گفتگو کر رہے تھے۔ انہوں نے کہا کہ فیڈمک کو جس ملک میں سرمایہ کاروں تک رسائی کی ضرورت ہے فارن آفس ان کی بھرپور مدد کرے گا۔ انہوں نے کہا کہ اس سلسلے میں وہ سفارتخانوں کے لیے باقاعدہ ایک پلان بنا کر ان سے شیئر کریں۔ وزیر خارجہ نے کہا کہ اس سلسلے میں ایک الگ اکنامک ونگ بھی بنایا گیا ہے جو باقاعدہ منصوبہ بندی کر کے بیرون ممالک سے سرمایہ کاری پاکستان لائے گا۔ انہوں نے کہا کہ جی ایس پی پلس کا سٹیٹس برقرار رکھنے کے لیے لابنگ شروع کر دی گئی ہے۔ انہوں نے کہا کہ ایف اے ٹی ایف کے حوالے سے بھی اس مرتبہ اچھی خبر آئے گی اور پاکستان کا نام گرے لسٹ سے نکال دیا جائے گا۔ شاہ محمود قریشی نے کپاس کی پیداوار میں کمی پر قابو پانے کے حوالے سے کہا کہ اس کے لئے ریسرچ پر بھرپور توجہ دینی ہو گی۔ انہوں نے یقین دہانی کروائی کہ وہ اس سلسلے میں خود وزیراعظم سے بات کریں گے۔ انہوں نے فیڈمک کی طرف سے ٹوبہ ٹیک سنگھ میں 1500 ایکڑ پر ایگرو بیسڈ اکنامک زون کے قیام کے منصوبے کو زراعت کی ترقی کے لیے بہترین اقدام قرار دیا۔
