• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہائیکورٹ حملہ کیس ، عدم حاضری پروکیل کیخلاف یکطرفہ کارروائی کافیصلہ

میرا شہر
اسلام آباد
25 مئی ، 2021
اسلام آباد (خبر نگار) اسلام آباد ہائیکورٹ نے عدالت عالیہ پر حملے کے توہین عدالت کیس میں اخبار اشتہار کے باوجود عدم حاضری پر ایک وکیل راجہ امجد ایڈووکیٹ کیخلاف یکطرفہ کارروائی کا فیصلہ کیا ہے جبکہ دیگر وکلا کو جواب داخل کرانے کیلئے ایک ہفتہ کی مہلت دیدی ہے، پیر کو کیس کی سماعت جسٹس میاں گل حسن اورنگ زیب نے کی، اخبار اشتہار کے بعد راجہ امجد ایڈووکیٹ کے علاوہ تمام وکلاء عدالت کے سامنے پیش ہو گئے، بعض وکلا نے جواب جمع کرا دیا جبکہ عدالت نے دیگر وکلا کو ایک ہفتے میں جواب جمع کرانے کی ہدایت جاری کی، عدالت نے رجسٹرار آفس کو ہدایت کی کہ سرکاری وکیل کو تمام وکلاء کے جوابات کی نقول فراہم کی جائیں، راجہ امجد ایڈووکیٹ اشتہار کے باوجود پیش نہیں ہوئے اسلئے یکطرفہ کارروائی ہو گی، ظفر وڑائچ ایڈووکیٹ نے کہا کہ پہلے مجھے دہشتگرد بنایا گیا پھر غلط فہمی کہہ کر ڈسچارج کردیا گیا اب اس عمر میں مجھے توہین عدالت میں طلب کر لیا گیا ہے، عدالت نے اسلام آباد بار کونسل کے ممبر نصیر کیانی ، وکلاء احسن مجید گجر ، نازیہ عباسی و دیگر کو جواب جمع کرانے کی ہدایت کرتے ہوئے سماعت 16 جون تک ملتوی کر دی۔
تازہ ترین