• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

… جاذب قریشی …

چراغوں کے بجھانے کو ہوا بے اختیار آئی

گلابوں کی مہک بکھری تو آواز شرار آئی

بگولوں نے سفر میں آندھیوں کا آسماں دیکھا

مگر اک فاختہ اپنے شجر تک بے غبار آئی

جسے تو نے اُجالا جان کر چہرے پہ لکھا تھا

وہی شہرت تری رسوائیوں کے ہمکنار آئی

اندھیروں میں مجھے خود اک ستارہ ڈھونڈنے آیا

کہ شہر بے ہنر سے اک صدائے اعتبار آئی

مری آنکھوں میں جتنے رنگ تھے سب جل گئے جاذبؔ

مگر وہ مجھ سے ملنے جب بھی آئی بے قرار آئی


دل کے زخم جلتے ہیں دل کے زخم جلنے دو

دل کے زخم جلتے ہیں دل کے زخم جلنے دو

ہم کو ٹھوکریں کھا کر آپ ہی سنبھلنے دو

روشنی فصیلوں کو توڑ کر بھی آئے گی

رات کی سیاہی کو کروٹیں بدلنے دو

سائباں کی خواہش میں اک سفر ہوں صحرا کا

جسم و جاں پگھلتے ہیں جسم و جاں پگھلنے دو

پتھروں کی چوٹوں سے آئنو نہ گھبراؤ

حادثوں کے آنگن میں زندگی کو پلنے دو

غم کی دھوپ میں جل کر رہ گئی ہر اک چھاؤں

ہم کو اپنی چاہت کے سائے سائے چلنے دو


صحرا میں کوئی سایۂ دیوار تو دیکھو

صحرا میں کوئی سایۂ دیوار تو دیکھو

اے ہم سفرو دھوپ کے اس پار تو دیکھو

جلتا ہوں اندھیروں میں کہ چمکے کوئی چہرہ

موسم ہیں عداوت کے مگر پیار تو دیکھو

دفتر کی تھکن اوڑھ کے تم جس سے ملے ہو

اس شخص کے تازہ لب و رخسار تو دیکھو

کیوں مانگ رہے ہو کسی بارش کی دعائیں

تم اپنے شکستہ در و دیوار تو دیکھو

کل شام وہ تنہا تھا سمندر کے کنارے

کیا سوچ رہے ہو کوئی اخبار تو دیکھو

آنکھیں ہیں کہ زخمی ہیں بدن ہیں کہ شکستہ

آشوب سفر ہوں مری رفتار تو دیکھو

معزز قارئین! آپ سے کچھ کہنا ہے

ہماری بھرپور کوشش ہے کہ میگزین کا ہر صفحہ تازہ ترین موضوعات پر مبنی ہو، ساتھ اُن میں آپ کی دل چسپی کے وہ تمام موضوعات اور جو کچھ آپ پڑھنا چاہتے ہیں، شامل اشاعت ہوں، خواہ وہ عالمی منظر نامہ ہو یا سائنس اینڈ ٹیکنالوجی، رپورٹ ہو یا فیچر، قرطاس ادب ہو یا ماحولیات، فن و فن کار ہو یا بچوں کا جنگ، نصف سے زیادہ ہو یا جرم و سزا۔ لیکن ان صفحات کو اپنا سمجھتے ہوئے آپ بھی کچھ لکھیں اور اپنے مشوروں سے نوازیں بھی۔ خوب سے خوب تر کی طرف ہمارا سفر جاری ہے۔ 

ہمیں خوشی ہے کہ آج جب پڑھنے کا رجحان کم ہوگیا ہے، آپ ہمارے صفحات پڑھتے ہیں اور وقتاً فوقتاً اپنی رائے کا اظہار بھی کرتے رہتے ہیں۔ لیکن اب ان صفحات کو مزید بہتر بنانے کے لیے اپنی رائے بھی دیں اور تجاویز بھی، تاکہ ان صفحات کو ہم آپ کی سوچ کے مطابق مرتب کرسکیں۔ ہمارے لیے آپ کی تعریف اور تنقید دونوں انعام کا درجہ رکھتے ہیں۔ تنقید کیجیے، تجاویز دیجیے۔ اور لکھیں بھی۔ نصف سے زیادہ، بچوں کا جنگ، ماحولیات وغیرہ یہ سب آپ ہی کے صفحات ہیں۔ ہم آپ کی تحریروں اور مشوروں کے منتظر رہیں گے۔ ہمارا پتا ہے:

رضیہ فرید۔ میگزین ایڈیٹر

روزنامہ جنگ، اخبار منزل،آئی آئی چندیگر روڈ، کراچی