• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کراچی میں آج دوپہر 2 تا 3 بجے بارش کا امکان


محکمۂ موسمیات کے ڈائریکٹر سردار سرفراز کا کہنا ہے کہ ملک کے سب سے بڑے شہر کراچی میں آج بھی دوپہر 2 سے 3 بجے کے دوران بارش متوقع ہے۔

میڈیا سے گفتگو کرتے ہوئے محکمۂ موسمیات کے ڈائریکٹر سردار سرفراز نے بتایا ہے کہ شہرِ قائد میں آج اور کل بھی بارش کا امکان ہے۔

انہوں نے بتایا کہ کراچی میں آج بھی گرج چمک کے ساتھ بارش کا امکان ہے، شہر میں کہیں معتدل اور کہیں تیز بارش ہو سکتی ہے۔

ڈائریکٹر محکمۂ موسمیات نے بتایا کہ ہوا کا کم دباؤ مشرقی سندھ اور راجستھان کے قریب موجود ہے، جس کے باعث دوپہر میں کراچی کے اطراف تھنڈر سیلز بن سکتے ہیں۔

ڈائریکٹر محکمۂ موسمیات سردار سرفراز کے مطابق شہر میں آج بھی نشیبی علاقوں میں اربن فلڈنگ کا خطرہ رہے گا۔

انہوں نے کہا ہے کہ ایک اور مون سون سسٹم 27 ستمبر کی رات یا 28 ستمبر کو کراچی پر اثر انداز ہو سکتا ہے۔

ان کا کہنا ہے کہ کراچی میں 27 ستمبر کو ایک اور اسپیل داخل ہونے کا امکان ہے، جس کی وجہ سے 27 سے 30 ستمبر تک شہرِ قائد میں بارش کا امکان رہے گا۔

ڈائریکٹر محکمۂ موسمیات سردار سرفراز کا یہ بھی کہنا ہے کہ مون سون سسٹم کو بحیرۂ عرب سے ملنے والی نمی کے باعث تقویت ملی ہے۔

واضح رہے کہ کراچی میں گزشتہ روز ہونے والی تیز بارش سے اربن فلڈنگ کی صورتِ حال پیدا ہوئی تھی۔

شہر میں جمع ہونے والا برساتی پانی بھی اتر گیا لیکن سڑکوں کے کنارے اب بھی پانی جمع ہے۔

برسات سے شہر کے مختلف علاقوں میں فیڈرز ٹرپ ہونے کے باعث معطل ہونے والی بجلی بھی بحال ہوگئی ہے۔

محکمۂ موسمیات کے اعداد و شمار کے مطابق سب سے زیادہ بارش سرجانی ٹاؤن میں 70 ملی میٹر ریکارڈ کی گئی، نارتھ کراچی میں 49 اعشاریہ 2 ملی میٹر، اولڈ ایئر پورٹ میں 19 اعشاریہ 2 ملی میٹر، سعدی ٹاؤن میں 16 اعشاریہ 1 ملی میٹر بارش ریکارڈ کی گئی۔

محکمۂ موسمیات نے کراچی، حیدر آباد، ٹھٹھہ، سکھر، لاڑکانہ، دادو اور نواب شاہ میں 23 سے 25 ستمبر تک بارش ہونے کا امکان ظاہر کیا ہے۔

قومی خبریں سے مزید