جب بھارتی نغمہ نگار کی انا نصرت فتح علی خان کو دیکھ کر ڈھیر ہوئی

13 اکتوبر ، 2021

شہنشاہِ قوالی نصرت فتح علی خان کے مداح ان کی وفات کو مدت گزر جانے کے بعد بھی ان کی زندگی کے اچھوتے لمحات کو جاننے کے لیے بیتاب رہتے ہیں۔

نصرت فتح کی قوالیوں میں روح اور دل کی ہم آہنگی کے باعث سننے والے آج بھی ان کے کلام میں کھو جایا کرتے ہیں۔ نصرت فتح کے جادو نے سرحدیں پار کیں اور بھارت میں بھی ان کے گیت اور قوالياں سر چڑھ کر بولتی ہیں۔

یہ قصہ بھی 1996 کا ہے جب وہ بالی ووڈ فلم ’کچے دھاگے‘ کی موسیقی ترتیب دینے کے سلسلے میں ممبئی کے ایک عالیشان ہوٹل میں ٹھہرے ہوئے تھے۔

بالی ووڈ میں یہ نصرت فتح علی خان کی تیسری فلم تھی، جس میں اجے دیوگن اور سیف علی خان مرکزی کردار ادا کررہے تھے۔

اجے دیوگن نے ایک شو میں نصرت فتح علی خان سے جُڑی خوشگوار یادیں اپنے مداحوں کو بتائیں، انہوں نے کہا کہ مجھے آج بھی یاد ہے کہ جب نصرت فتح علی خان فلم کی موسیقی ترتیب دینے کے سلسلے میں بھارت آئے تھے اور مہینہ بھر یہیں رُکے تھے۔

نصرت فتح علی خان اپنی زندگی کے آخری ایام میں مختلف بیماریوں میں مبتلا ہونے کے باعث فربہی کا شکار ہوگئے تھے۔

اجے دیوگن نے بھارتی موسیقار آنند بخشی اور نصرت فتح علی خان کا قصہ بیان کرتے ہوئے کہا کہ نصرت فتح علی خان اپنے موٹاپے کے باعث گاڑی میں سفر نہیں کرسکتے تھے یہاں تک کہ وہ خود سے ایک قدم بھی نہیں بڑھا سکتے تھے۔

جب نصرت فتح علی خان نے آنند بخشی کو پیغام بھیجا کہ وہ آجائیں تاکہ مل کر البم پر کام ہوسکے تو ، آنند بخشی سمجھے کہ نصرت فتح علی خان پاکستان سے آئے ہیں اور ان میں انا کا عنصر بہت زیادہ ہے اس لیے وہ خود اُن سے ملنے نہیں آرہے بلکہ مجھے ہوٹل کی دعوت دے رہے ہیں۔

دو ہفتے تک آنند بخشی اگر کوئی گیت لکھ کر بھیجتے تو نصرت فتح علی خان اس میں کسی تبدیلی کا کہتے ، تو کبھی آنند بخشی کو نصرت کی دھن پسند نہیں آتی۔

اب پندرہ سے بیس دن ایسے ہی گزر گئے تو ، آخر تنگ آکر نصرت فتح علی خان نے اپنے لوگوں سے کہا کہ وہ کسی طرح انہیں آنند بخشی کی طرف لے جائیں تاکہ گیت میں ہمیں کوئی کامیابی مل سکے۔

نصرت فتح علی خان کو آٹھ دس افراد اُٹھا کر آنند بخشی کی طرف لے کر گئے، یہ منظر دیکھ کر آنند رو پڑے کہ میں کس انا کا شکار تھا۔

اجے دیوگن نے بتایا کہ یہ منظر دیکھ کر آنند بخشی نے نصرت فتح علی خان سے کہا کہ آپ جہاں کہیں گے میں وہیں آپ کے ساتھ رہوں گا اور ایک ساتھ کام آگے بڑھائیں گے۔

1999 میں جب اجے دیوگن کی فلم ’کچے دھاگے‘ ریلیز ہوئی تو اس سے مدت قبل نصرت فتح علی خان دنیا سے رخصت ہوچکے تھے۔

تازہ ترین