بیرونِ ملک جاں بحق شخص کا جگر پاکستانی کو لگا دیا گیا

January 11, 2022

پاکستان کڈنی اینڈ لیور انسٹیٹیوٹ لاہور، جہاں بیرونِ ملک جاں بحق ہونے والے شخص کے جگر کی پاکستانی مریض کو پیوندکاری کی گئی

پاکستان میں پہلی بار بیرونِ ملک جاں بحق ہونے والے شخص کا جگر پاکستانی مریض کو لگا دیا گیا۔

پاکستان کڈنی اینڈ لیور انسٹیٹیوٹ (پی کے ایل آئی) لاہور کے سربراہ ڈاکٹر فیصل سعود ڈار کے مطابق ابوظہبی میں جاں بحق ہونے والے پاکستانی کا جگر اور گردے خصوصی طیارے سے پاکستان لائے گئے۔

انہوں نے بتایا کہ ابوظہبی میں انتقال کرنے والے پاکستانی شخص کے اعضاء پی کے ایل آئی لاہور میں ٹرانسپلانٹ کیے گئے، ابو ظہبی سے کلیو لینڈ کلینک کی 4 رکنی ٹیم بھی پاکستان آئی۔

سربراہ پاکستان کڈنی اینڈ لیور انسٹیٹیوٹ نے بتایا کہ پاکستان اور متحدہ عرب امارات (یو اے ای) بعد از مرگ اعضاء کے عطیات کا رجحان بڑھانے کی کوشش کر رہے ہیں۔

انہوں نے مزید بتایا کہ بعد از مرگ اعضاء کے عطیے کے ذریعے 2 پاکستانی مریضوں کی جان بچائی گئی۔

پی کے ایل آئی لاہور کے سربراہ ڈاکٹر فیصل سعود ڈار نے یہ بھی بتایا کہ گردے اور جگر کی پیوندکاری کے دونوں مریض صحت یاب ہیں۔