بوجھو تو جانیں

January 15, 2022

1۔کون سی وہ اک چیز ہے، بولو

ہر جانب تم گھوم کے دیکھو

وہ ہر سو موجود ہے بچو

رنگ بِنا بھی ہے وہ سُندر

اُس کے دم سے آج ہیں گھر گھر

جام، صراحی، کلسی، گاگر

بن اُس کے جل جائے کھیتی

بن اُس کے مر جائے مچھلی

سمٹے تو بن جائے قطرہ

پھیلے تو ہو جائے دریا

پھول، شجر انسان، پرندہ

سب کے سب ہیں اُس سے زندہ

۔۔۔۔۔۔۔۔۔۔۔۔۔۔۔۔۔۔۔۔

ہر دم پیار لٹانے والی

ہر پل ناز اُٹھانے والی

ہم سب کے آرام کی خاطر

اپنا چین گنوانے والی

دُور کی کوڑی آج نہ لاؤ

جھٹ سے اُس کا نام بتاؤ

اک اک کر کے پھر اے بچو

اُس کے احسانات گناؤ

۔۔۔۔۔۔۔۔۔۔۔۔۔۔۔۔۔۔۔۔

بوجھوتو جانیں کے جوابات 1۔ پانی 2۔ماں