ملتان (سٹاف رپورٹر) محکمہ واسا نے سیوریج منصوبوں اور کراؤن فیلیئرز کی مرمت پر جاری کام کے باعث واٹر سپلائی لائنیں بند کر دیں ، جس کے باعث شہری پینے کے پانی کو ترس گئے ، متاثرہ شہریوں نے خالی برتن اٹھا کر واٹر سپلائی کی بندش کے خلاف احتجاج کیا اور پانی کی بحالی کا مطالبہ کرتے ہوئے شدید نعرے بازی کی،شالیمار کالونی ، زکریا ٹاؤن ، نواب شوکت سٹریٹ سمیت مختلف علاقوں میں سیوریج لائنوں اور کراؤن فیلیئرز کی مرمت کے کام کی وجہ سے واٹر سپلائی لائنوں کو بھی بند کر دیا گیا تھا ، جس سے گھریلو صارفین کوپانی کی سپلائی معطل ہو گئی ، متاثرہ شہریوں کی جانب سے واسا انتظامیہ کو مسئلہ سے آگاہ کئے جانے کے باوجود بھی واٹر سپلائی لائنیں چالو نہیں کی گئیں ، جس پر مکینوں نے پانی کی بندش کے خلاف احتجاجی مظاہرہ کیا اور ہاتھوں میں خالی برتن اٹھا کر سڑک بلاک کر دی ، مشتعل شہریوں نے واسا افسران اور ٹھیکیدار کیخلاف شدید نعرے بازی کی اور پانی کی بحالی کا مطالبہ کیا ، مظاہرین نے مطالبات تسلیم نہ ہونے پر واسا دفاتر کے گھیراؤ کی دھمکی دیدی ہے۔