• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

منیر افسر آج چیئرمین نادرا کا عہدہ سنبھالیں گے، GHQ سے چارج چھوڑ دیا

آج کا اخبار
اہم خبریں
04 اکتوبر ، 2023
اسلام آباد ( رپورٹ حنیف خالد)لیفٹیننٹ جنرل محمد منیر افسر آج بدھ کو چیئرمین نیشنل ڈیٹا بیس اینڈ رجسٹریشن اتھارٹی (نادرا) کا عہدہ سنبھالیں گے، گزشتہ روز (منگل) پاکستان آرمی کے حاضر سروس افسر لیفٹیننٹ جنرل محمد منیر افسر نے جی ایچ کیو میں آئی جی کمیونیکیشن اینڈ آئی ٹی کے عہدے کا چارج چھوڑ دیا۔ نادرا ہیڈکوارٹر پہنچنے پر سینئر عہدیداروں سے تعارف ہوگا، اتھارٹی کے مختلف ڈیپارٹمنٹس کی بریفنگ دی جائے گی نئے چیئرمین نادرا لیفٹیننٹ جنرل محمد منیر افسر ہلال امتیاز (ملٹری) پاکستان آرمی اور اقوام متحدہ مشن میں آئی ٹی سے متعلق تکنیکی ترقی اور انتظام کا وسیع تجربہ رکھتے ہیں۔ لفٹیننٹ جنرل منیر افسر پبلک پالیسی اینڈ نیشنل سکیورٹی مینجمنٹ میں ایم فل کی ڈگری حاصل کرنے والے فوجی افسر ہیں۔ لیفٹننٹ جنرل منیر افسر نے جیوگرافک انفارمیشن سسٹمز (جی آئی ایس) اور ریمورٹ سینسگ میں ایم ایس کیا ہے انہیں فوٹو میٹری کے ذریعے تیز رفتار جغرافیائی ڈیٹا تخلیق سے متعلق صدارتی ایوارڈ سے بھی نوازا گیا ہے۔ انہوں نے نیشنل ڈیفنس یونیورسٹی واشنگٹن سے نیشنل ریسورس سٹریٹجی (سی اینڈ آئی ٹی انڈسٹری اینڈ سپلائی چین مینجمنٹ) میں ایم ایس کیا، جہاں انہیں ایک ممتاز گریجویٹ قرار دیا گیا۔ اس وقت وہ نیشنل یونیورسٹی آف سائنس اینڈ ٹیکنالوجی (نسٹ) اسلام آباد میں ریمورٹ سینسنگ میں پی ایچ ڈی کے امیدوار ہیں ان کا تحقیقی مقالہ ریموٹ سینسنگ اور مصنوعی ذہانت کے ذریعے پلانٹ ڈزیز ز(پودوں کی بیماریاں) کا پتہ لگانے سے متعلق ہے۔ آئی ٹی اور جی آئی ایس افسر کے طور پر یو این ایم ایس میں خدمات سرانجام دیتے رہے ہیں۔ میجر جنرل کی حیثیت سے وہ ڈی جی کمانڈ کنٹرول کمیونیکیشن کمپیوٹر اینڈ انٹیلی جنس (C-41) کے ڈائریکٹر جنرل بھی رہے جو آئی ٹی کے مکمل انتظام کا ذمہ دار ہے۔ اکتوبر 2022 میں لیفٹیننٹ جنرل کے عہدے پر ترقی ملنے کے بعد وہ انسپکٹر جنرل کمیونیکیشن اینڈ آئی ٹی کے ساتھ کمانڈر پاکستان آرمی سائبر کمانڈ بھی رہ چکے ہیں۔
اہم خبریں سے مزید