• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گورنر سندھ نے ایک ہفتے میں مہنگائی کم ہونے کی خوشخبری سنادی


گورنر سندھ عمران اسماعیل نے کہا ہے کہ وزیراعظم کو مہنگائی کی صورتحال کی بہت فکر ہے، ایک ہفتے میں مہنگائی کم ہوجائے گی۔

وزیراعظم ہاؤس کے باہر میڈیا سے گفتگو میں گورنر سندھ نے کہاکہ منافع خوروں سے نمٹنے اور کم آمدنی والے طبقے کو ضروری اشیا اور پٹرول پر سبسڈی دینےکا پلان بنایا گیا ہے۔

انہوں نے کہا کہ ملک میں منافع خور چیزیں مہنگی کررہے ہیں۔

گورنر سندھ نے اس تاثر کی تردید کی کہ مہنگائی کے خلاف حکومتی اقدامات اپوزیشن اتحاد (پی ڈی ایم) کے احتجاج کے ڈر کا نتیجہ ہے۔

اُن کا کہنا تھا کہ حکومت کا کھانے پینے کی اشیاء اور پٹرول پر سبسڈی دینے کا منصوبہ ہے جبکہ ہم نے منافع خوروں سے نمٹنے کا پلان بنایا ہے۔

عمران اسماعیل نے مزید کہا کہ پی ڈی ایم سے ڈر کی کیا ضرورت؟ اجلاس میں ان کا ذکر تک نہیں آیا۔ اپوزیشن منتشر ہے، حکومت کو ان سے کوئی خوف نہیں۔

انہوں نے یہ بھی کہا کہ سندھ میں آٹے کی قیمت نیچے نہیں آرہی، مہنگائی اس وقت پوری دنیا میں ہے، دنیا میں ہونے والی مہنگائی کا اثر پاکستان پر بھی پڑ رہا ہے۔

گورنر سندھ نے کہا کہ وزیراعظم نے وزراء کو عوامی رابطے کی ہدایت کی اور کہا کہ وہ عوام سے مل کر اُن کے مسائل جانیں۔

اُن کا کہنا تھا کہ آج پلان بنایا گیا ہے آئندہ سندھ میں حکومت تحریک انصاف کی ہو۔

قومی خبریں سے مزید