کشمیریوں کی جدوجہد کو دبایا نہیں جاسکتا، شاہ محمود قریشی

وزیر خارجہ شاہ محمود قریشی نے کہا ہے کہ لاک ڈاؤن اور انسانی حقوق کی پامالیوں کے باوجود کشمیریوں کی جدوجہد کو دبایا نہیں جاسکا، کشمیری بہادری کے ساتھ بھارتی مظالم کا سامنا کر رہے ہیں۔

کشمیریوں کے یوم سیاہ پر پیغام میں وزیر خارجہ شاہ محمود قریشی نے کہا کہ 27 اکتوبر کشمیریوں کے لئے ایک تاریک دن کی حیثیت رکھتا ہے۔

وزیرخارجہ نے بتایا کہ آج کے دن بھارت نے غیر قانونی طور پر جموں و کشمیر پر قبضہ کیا، کشمیری بہادری کے ساتھ بھارتی مظالم کا سامنا کر رہے ہیں۔

یوم سیاہ، مقبوضہ وادی میں آج مکمل ہڑتال ہوگی

صدر عارف علوی نے یوم سیاہ پر اپنے پیغام میں کہا ہےکہ 27 اکتوبر 1947 کو بھارت نے جموں و کشمیر پر غیرقانونی طور پر قبضہ کیا تھا۔

ان کا کہنا تھا کہ مسئلہ کشمیر سلامتی کونسل کی قراردادوں کے مطابق حل ہونا چاہیے، کشمیری عوام کی امیدیں ایک دن ضرور پوری ہوں گی۔

واضح رہے کہ کنٹرول لائن کے دونوں اطراف اور پاکستان سمیت دنیا بھر میں مقیم کشمیری آج یوم سیاہ منا رہے ہیں، مقبوضہ وادی میں مکمل ہڑتال کا اعلان کیا گیا ہے۔