بغیر کسی وارننگ لاٹھی چارج اور آنسوگیس کی شیلنگ شروع کی گئی، امین الحق

26 جنوری ، 2022

وفاقی وزیر برائے انفارمیشن ٹیکنالوجی امین الحق نے کہا ہے کہ ہم وزیر اعلیٰ ہاؤس کے سامنے پر امن احتجاج کررہے تھے، بغیر کسی وارننگ لاٹھی چارج اور آنسوگیس کی شیلنگ کی گئی۔

کراچی میں ایم کیو ایم پاکستان کی طرف سے بلدیاتی قانون کے خلاف نکالی گئی ریلی پر پولیس کی جانب سے شیلنگ کرنے پر وفاقی وزیر امین الحق کا ردعمل سامنے آگیا۔

جیو نیوز سے گفتگو کرتے ہوئے امین الحق نے کہا کہ ہم سیاسی لوگ ہیں بات چیت کرنا چاہتے ہیں، احتجاج کرنا آئینی حق ہے، بلدیاتی قانون کے خلاف عوام مسلسل احتجاج کر رہے ہیں۔

امین الحق نے کہا کہ ہم انتہائی پر امن طریقے سے وزیر اعلیٰ ہاؤس پہنچے تھے، ریلی پر طاقت کا بے دریغ استعمال کیا گیا، بغیر وارننگ ریلی پر شدید شیلنگ کی گئی۔

واضح رہے کہ متحدہ قومی موومنٹ پاکستان (ایم کیو ایم ) کی کراچی میں احتجاجی ریلی بلدیاتی قانون کے خلاف نکالی گئی، پولیس کی جانب سے وزیر اعلیٰ ہاوس کے باہر مظاہرین پر آنسوگیس کی شیلنگ اور لاٹھی چارج کیا گیا۔