شہباز شریف کا صدر سے نگران وزیراعظم کیلئے مشاورت سے انکار

06 اپریل ، 2022

قائد حزب اختلاف شہباز شریف نے صدر عارف علوی کو خط لکھ کر نگران وزیراعظم کے لیے مشاورت سے انکار کردیا ہے۔

صدر عارف علوی کو لکھے گئے جوابی خط میں قائد حزب اختلاف شہباز شریف نے کہا کہ آپ معاملے پر جاری سپریم کورٹ کے حکم امتناع کی خلاف ورزی کر رہے ہیں۔

شہباز شریف کا کہنا ہے کہ میں اس مشاورت کا حصہ نہیں بن سکتا۔

واضح رہے کہ گزشتہ روز اپوزیشن لیڈر شہباز شریف نے صدر عارف علوی کا خط ملنے کی تردید کرتے ہوئے کہا تھا کہ مجھے ابھی تک باضابطہ طورپر صدر کا کوئی خط نہیں ملا ہے۔

لیگی صدر کا کہنا تھا کہ اس وقت تو عارف علوی اور عمران خان خود آئین شکنی کے مرتکب ہیں، صدر عارف علوی نے آئین کو پاؤں تلے روندا ہے آئین شکنی کی ہے، پہلے اس کا فیصلہ ہوگا اگلی بات بعد میں ہوگی۔

شہباز شریف نے بتایا تھا کہ مریم اورنگزیب نے مجھے آگاہ کیا کہ آپ کو ذیلی کمیٹی میں زبانی شرکت کی دعوت دی گئی ہے، جس پر میں نے پوچھا کہ اپوزیشن کے باقی ارکان کو دعوت آئی ہے؟، مریم اورنگزیب نے بتایا کہ اپوزیشن کے اور کسی رہنما کو دعوت نہیں آئی ہے۔

انہوں نے کہا کہ یہ کیا بھونڈا مذاق ہے مجھ اکیلے کو اور وہ زبانی آخری وقت بلایا جائے، ہم ان کے غلام ہیں کیا یہ کوئی طریقہ ہے زبانی کلامی بلانے کا، میں وہاں جاؤں اور مجھے کہا جائے کہ آپ کو تو بلایا نہیں، یہ کیا ہے ؟

قومی خبریں سے مزید