شیخ رشید کا گرفتار بھتیجا تھانے منتقل

مسجدِ نبوی صلی اللّٰہ علیہ وسلم میں نعرے لگانے کے معاملے پر گرفتار کیے گئے سابق وزیرِ داخلہ شیخ رشید کے بھتیجے ایم این اے شیخ راشد شفیق کو تھانہ ایئر پورٹ اٹک منتقل کر دیا گیا ہے۔

ذرائع نے بتایا ہے کہ شیخ راشد شفیق کو راہداری ریمانڈ کے لیے اٹک کی ماتحت عدالت میں پیش کیا جائے گا۔

اس سے قبل شیخ راشد شفیق کو ایف آئی اے کے سیل شفٹ کر دیا گیا تھا۔

شیخ راشد شفیق عمرے کی ادائیگی کے بعد نجی ایئر لائن کی پرواز سے اسلام آباد پہنچے تھے کہ انہیں اسلام آباد ایئر پورٹ پر گرفتار کر لیا گیا تھا۔

شیخ راشد شفیق کے خلاف فیصل آباد میں مقدمہ درج کیا گیا تھا۔

شیخ رشید کا بھتیجا شیخ راشد اسلام آباد ایئرپورٹ سے گرفتار

رپورٹس کے مطابق شیخ راشد شفیق نجی ایئرلائن کی پرواز سے اسلام آباد پہنچے تھے۔

مقدمے میں چیئرمین پی ٹی آئی عمران خان، فواد چوہدری، شہباز گِل، انیل مسرت، نبیل مسرت، جہانگیر چیکو، رانا عبدالستار، عامر الیاس بھی ملزم نامزد ہیں۔

مقدمہ 15 معلوم اور 100 سے 150 نامعلوم ملزمان کے خلاف درج کیا گیا تھا۔

فیصل آباد میں مقدمہ محمد نعیم کی مدعیت میں تھانہ مدینہ ٹاؤن میں درج کیا گیا۔

مقدمے میں توہینِ مذہب کی دفعہ سمیت 4 دفعات لگائی گئی ہیں جن کے تحت ملزمان کو عمر قید ہو سکتی ہے۔

ایف آئی آر میں کہا گیا ہے کہ مسجد نبوی ﷺ میں پاکستانی زائرین کو ہراساں کر کے شعائرِ اسلام کی انجام دہی سے زبردستی روکا گیا۔

ایف آئی آر کے متن کے مطابق یہ سارا واقعہ سوچی سمجھی سازش کے تحت پیش آیا۔