وزیر اعظم شہباز شریف کی بہادر آئل ٹینکر ڈرائیور کیساتھ تصویر وائرل

وزیراعظم شہباز شریف نے بلوچستان سے تعلق رکھنے والے بہادر آئل ٹینکر ڈرائیور شیر احمد عرف فیصل بلوچ کے ساتھ تصویر سوشل میڈیا پر شیئر کردی۔

شہباز شریف نے اپنے ٹوئٹ میں لکھا کہ ’فیصل بلوچ سے مل کر ان کی بہادری کے لیے انہیں تمغہ شجاعت کے لیے نامزد کر کے خوشی ہوئی‘۔

وزیراعظم نے کہا کہ ’فیصل بلوچ زندگی کے حقیقی ہیرو ہیں، اُنہوں نے دوسروں کی جان بچانے کے لیے اپنی جان خطرے میں ڈالی‘۔

اُنہوں نے مزید کہا کہ ’میں فیصل بلوچ کی بے لوث ہمت کو سراہتا ہوں‘۔

بلوچستان، آگ لگے آئل ٹینکر کو آبادی سے دور لیجانے والے ڈرائیور کیلئے انعام کا اعلان

وزیر اعلیٰ بلوچستان میر عبدالقدوس بزنجو نے دو روز قبل کوئٹہ میں آتشزدگی کے شکار آئل ٹینکر کو جان پر کھیل کر آبادی سے دور لے جانے والے ڈرائیور کے لئے 5 لاکھ روپے کے انعام کا اعلان کردیا

خیال رہے کہ آئل ٹینکر میں آگ لگنے کا واقعہ کوئٹہ کے نواحی علاقے قمبرانی روڈ پر پیش آیا تھا، جہاں پیٹرول پمپ پر کھڑے آئل ٹینکر میں اچانک آگ لگ گئی تھی۔

ڈرائیور فیصل آگ لگے ہوئے ٹینکر کو حاضر دماغی اور بہادری کا مظاہرہ کرتے ہوئے آبادی سے دور لے گیا تھا۔